Eleksyon prezidansyel 2015 |26 November 2015

Preparasyon i dan staz final

Preparasyon pour eleksyon prezidansyel ki pou fer le 3, 4 ek 5 Desanm in ariv dan staz final bann reprezantan medya ti ganny dir yer.

Se tyermenn Komisyon Eleksyon Hendrick Gappy ki ti dir sa yer apremidi pandan en rankont avek lapres kot Biro Eleksyon dan Bibliotek Nasyonal.

Osi prezan ti sef zofisye elektoral Charles Morin, sef zofisye lanrezistreman Lorna Lepathy, e Marie-May Bastienne, reprezantan lakonpanyen Metissage ki responsab pour prepar bann kominikasyon pour Komisyon Eleksyon.

Msye Gappy ti dir ki medya i annan en rol enportan pour zwe dan en eleksyon akoz i ede alert sitwayen lo bann move pratik e oso edik voter.

Msye Morin ti dir ki non bann zofisye eleksyon pou ganny gazete byento e ki lalis bann reprezantan bann kandida prezidansyel ki pou obzerv eleksyon in fini pare.

Laranzman in fini ganny fer avek Air Seychelles ek Lakonpanyen Developman Zil (IDC) pour transport bann bwat vote par avyon ek bato, zofisye eleksyon, reprezantan bann kandida, obzervater ek manm sekirite lo bann zil, Msye Morin ti azoute.

Me i ti azoute ki i pa posib pour tou reprezantan bann kandida al lo bann zil elwanye akoz napa ase plas lo avyon. Alors pandan en miting ki ti ganny fer avek bann reprezantan bann kandida en desizyon ti ganny pran ki vi ki i annan senk kandida dan lopozisyon zot pou bezwen deside lekel enn antre zot ki pou pran plas lo avyon akote en reprezantan parti ki opouvwar, Parti Lepep.

«I pa posib pour tou reprezantan bann kandida ganny plas lo avyon akoz 2 avyon Lakonpanyen Developman Zil i anba mentenans. Alors bann reprezantan bann kandida ki ti prezan pour sa miting ti dakor ki dan ka kot i annan zis 2 plas lo avyon, 1 reprezantan bann parti lopozisyon ek 1 reprezantan parti ki opouvwar, Parti Lepep, pou akonpany bwat vote, zofisye eleksyon, obzervater ek manm sekirite lo avyon pour al lo bann zil elwanye. Dan ka kot i annan 4 plas, la i ava annan 3 reprezantan bann parti lopozisyon ek 1 reprezantan parti ki opouvwar. Sa in ganny fer pour annan fairness akoz apard kandida Parti Lepep, tou lezot kandida in dakor ki zot dan lopozisyon,» Msye Morin.

Vi ki serten manm medya pa ti anfaver sa desizyon e kestyonnen si vre 2 avyon Lakonpanyen Developman Zil i anba mentenans, Msye Morin ti dir ki sa i en fe e ki personn pa ti konnen si eleksyon ti pou ganny fer la. I ti azoute ki sel lot opsyon se pour lwe en avyon Sid Afrik me sa i kout ser.

Letan i ti ekspike ki mannyer dan dimoun lo bann zil elwanye pour vote, Msye Gappy ti dir ki zot pou ganny en lanvlop avek non zot distrik kot zot in anrezistre lo la. Letan sa dimoun in fini vote i pou met son bilten dan sa lanvlop, kol li apre met dan bwat vote. I ti azoute ki par egzanp en peser ki pe lapes obor en zil elwanye kot vote pe deroule le 3 Desanm e ki krwar i pa pou ariv atan lo Mahe, Praslin ek La Digue pour vote le 5 Desanm i kapab vote lo sa zil pli pre kot i ete e i pou swiv menm prosedir ki en dimoun ki pe travay lo zil.  

Tou sa bann lanvlop pou ganny anmennen Mahe menm zour e le 4 Desanm zot pou ganny triye par distrik e bomaten le 5 Desanm zot pou ganny anmennen dan sa bann distrik kot sa voter in anrezistre e ganny mete dan bwat vote e ganny konte alafen vot. Tou sa bann prosedir pou ganny fer dan prezans bann reprezantan bann kandida.

Msye Gappy ti eksplike ki pour bann dimoun ki vot le 3, tou prekosyon in ganny pran pour ki zot vot i sekre e ki bann bwat vote i reste an sekirite ziska ki vot i konte Dimans le 5.


Nou a rappel ki tou dimoun ki’n vote avan le 5 pou ganny anrezistre lo en lalis e reprezantan kandida dan sak stasyon pou ganny enn sa lalis pour asire ki sa bann dimoun pa vot de fwa. An plis, lank endelibil ki pou ganny mete lo ledwa en dimoun en fwa ki in vote, pou montre ki in deza vote.

I osi enportan pour note ki si en zabitan Ile Perseverance pa al vote dan stasyon spesyal laba le 3 Desanm, i pou kapab vote le 5 Desanm dan distrik kot in anrezistre.

Msye Gappy ti azoute ki dapre leksperyans rezilta final i ekspekte anonse ver minwi.