SNP i kennsel konferans de pres akoz labsans SBC |26 November 2015

Tou ti’n pare Arpent Vert yer bomaten pour en konferans de pres kot Parti Nasyonal Seselwa (SNP) ti pou koz lo son progranm pour Praslin ek La Digue. SNP ti’n ekspekte ki SBC (Seychelles Broadcasting Corporation) i pas sa konferans de pres dan kad sa 10 minit ki i akord bann parti pour zot kanpanny lo Praslin e 5 minit lo La Digue. Sa i akoz apard bann vizit kot bann lakour, sa parti in dir ki i napa lentansyon fer okenn rali lo sa de zil.

Me zisteman, ti mank zis en eleman pour sa konferans de pres: SBC pa ti prezan e lider SNP e kandida prezidansyel dan prosen eleksyon Wavel Ramkalawan ti finalman deside pour kennsel sa rankont avek lapres.

Apre ki bann medya ki ti prezan ti’n esper en er-d-tan, Msye Ramkalawan ti eksplike ki SBC ti’n konfirmen ki zot ti pou vini, me ki san enform SNP zot ti’n finalman deside pour pa kouver sa levennmen akoz i pa ti pe deroul lo Praslin ek La Digue.

«Sa i ridikil,» Msye Ramkalawan ti dir, an deklaran ki «nou pe fer en konferans lapres ki koz lo nou progranm pour Praslin e La Digue e i pa enportan si nou lo Praslin ou La Digue ou non». I ti menm zwe lo sa mo ‘lo’ pour dir ki «i kapab vedir fizikman lo sa de zil oubyen konsernan zot».

I ti azoute ki konteni pa ti pou sanze depandan lo kote zot koze.

Msye Ramkalawan ti osi fer resorti ki largiman SBC pa lozik lo kote ekonomik, akoz SBC pou bezwen depans bokou plis larzan pour al kouver en rali SNP Praslin oubyen La Digue.
«Sa pa lozik osi lo kote depans kot SBC ti pou bezwen pey bato, manze, lwe en loto laba olye depans preski nanryen ditou isi. Mon trouv sa vreman ridikil e i en desizyon ki mank lozik,» Msye Ramkalawan ti ensiste.

Malgre sa lensidan, SNP in dir ki i napa lentansyon fer en konplent formel avek Komisyon Eleksyon ek Komisyon Medya, me ki i pou plito kontinyen negosye avek SBC pour ki sa konferans de pres i kapab fer plitar.

Antretan, Msye Ramkalawan in deklare ki i satisfe par lafason ki kanpanny eleksyon pe deroule, malgre sa ki in apel serten lensidan provokasyon e menm vyolans de lapar serten adverser politik.
In menm dir ki bann lider ki prezan kot sa bann lensidan pa fer nanryen e pa pran zot responsabilite pour kontrol zot siporter. In sit legzanp Ile Persévérance ek Port Glaud kot i dir i’n ganny maltrete.

Pour bann zour ki pe vini, lider SNP i annan en mesaz pour son bann siporter e tou voter an zeneral :

«Mon mesaz i toultan kler e senp. Ou devwar se al dan ou stasyon vote e vote. I pa ou louvraz pour kas nanryen. Pa provok kanmarad. Pa pas paviyon dan figir kanmarad. Pa lager ek personn e aksepte desizyon ki lepep i fer.»

Konsernan serten rimer ki pe sirkile ki en parti politik i kapab konnen pour ki en dimoun in vote e an retour pey li pour son vot, Msye Ramkalawan in dir ki elektora i bezwen annan konfyans ki vote i sekre e ki personn pa pou kapab idantifye ou vot atraver ou papye vote.

«Sa bann spekilasyon i zis pour senm lafreyer. Ou vot i sekre. Personn pa pou konnen kote ou’n vote,» i ti dir.