Follow us on:

Facebook Twitter LinkedIn YouTube

Archive -Seychelles

Les Li Viv i donn formasyon bann zenn manman |26 November 2015

Douz zenn manman in resevwar zot sertifika apre ki zot in swiv formasyon dan litilizasyon konpiter, Angle, Franse, laranzman fler sek ek boulanzri.

Se lasosiasyon Les li Viv ki’n organiz sa formasyon nef mwan pour sa bann zenn manman aze ant 15 a 20-an, e seremoni prezantasyon sertifika ti fer kot biro sa lorganizasyon dan batiman ‘La Salle d’Oeuvres’ Mardi bomaten.

Pandan zot formasyon, sa group zenn manman in osi benefisye avek konsey lo meyer fason pour fer grandi zot pti baba.

Tyermenn Les Li Viv, Florence Mémé, in dir ki sa lorganizasyon ki ankouraz bann zenn fiy ki tonm ansent pour gard zot baba olye fer avortman, i osi ed sa bann fiy ganny en lanplwa.

Me in azoute ki zot plito ganny ankouraze pour retourn lekol e kontinyen zot letid apre ki zot in ganny zot zanfan.

“Nou’n esey ouver laport pour zot. Se zot ki aprezan bezwen antre par sa laport. Si zot pe retourn lekol, pran zot letid seryezman. Si zot pe al travay, kontinyen swiv bann pti kour formasyon ki pou edik zot plis,» i ti dir.

Madanm Mémé ti anonse ki enn sa bann fiy pe menm al fer son legzanmen IGCSE an Angle, apre ki in swiv laklas avek Aldec (Adult Learning and Distant Education Centre) dan Sanmdi.

Tyermenn Les Li Viv ti remersye tou bann ki pe kontribye dan sa bann formasyon e dan fonksyonnman sa lorganizasyon, pour sa ki in dir «ede sov lavi bann pti inosan». Sa i enkli gouvernman, Legliz Katolik, Computing and Additional Learning, Rotary Club Coco de Mer ek labank Barclays.

Reprezantan Barclays Antoine Esther, Coleen Morel e Eline Moses ti prezan kot sa seremoni prezantasyon sertifika.

Madanm Mémé in komante ki avek 298 ka lansentman anba laz lannen pase, sa problenm pe kontinyelman ogmante dan nou sosyete.

Mikerla Vital, en zenn manman 19-an ki’n benefisye avek sa formasyon, in dir ki i aprezan annan konnesans neseser ki pou permet li fer laplikasyon pour en louvraz dan lendistri tourizm.

In azoute ki i pou dezorme kapab pli byen fer grandi son zanfan.

 

 

 

» Back to Archive