Lasanble Nasyonal i aprouv revizyon lalwa lasante piblik |07 October 2015

Lasanble Nasyonal ti yer aprouv revizyon dan Lalwa Lasante Piblik ki ti date depi 1960.

Letan i ti prezant sa nouvo lalwa, Minis pour Lasante Mitcy Larue ti fer resorti ki  sa revizyon i fer sa lalwa vin modern, met li azour avek devlopman e adres bann konsern lasante piblik aktyel avek bann mezir prevansyon e kontrol. Parmi bann defi lasante modern, i ti sit logmantasyon dan bann maladi; serten nouvo e serten ki Lorganizasyon Mondyal Lasante (WHO) ti’n deklar eliminen me ki’n retournen. I ti azoute ki avek devlopman sirtou dan transpor, maladi i aprezan ariv dan en pei pli vitman.

«Maladi lontan ti vin abor bato. Prezan i kapab arive dan de trwa erdtan,» i ti dir.

Minis Larue ti fer remarke ki bann maladi resan in entrodwir par en dimoun ki’n antre dan pei. Vi ki vye lalwa pa ti pe adres sa sitiasyon dan son totalite, i ti eksplike ki en nouvo lalwa ti plis ki neseser pour adres bann, H1N1 e Ebola parmi lezot.

«En sistenm prevansyon i enportan pour anpes sa arive. […] Nouvo lalwa i adres bann febles e pou permet met bann striktir an plas pour anpes maladi antre dan pei e propaze,» i ti azoute.

Sa lezislasyon modern ki minis i dir pou amelyor e protez lasante piblik pou enkli nouvo definisyon, par egzamp revwar fonksyon e donn plis pouvwar Komisyonner Lasante piblik e son bann zofisye. I osi gouvern bann mezir ki konsern polisyon sours delo, zestyon simityer, propagasyon maladi enfektyez, pes e vermin eksetera, e kontrol lo tou aktivite ki kapab annan lefe advers lo lasante. I osi definir bann lofans asosye avek neglizans e pratik sanitasyon e lizyenn ki permet propagasyon maladi e sanksyon pour bann dimoun ki pa respekte sa bann lalwa.

Tou bann manm Lasanble ki ti pran laporal ti akey sa bil koman en zouti pour kontinyen protez lasante piblik.

«Prevansyon i pli bon ki gerizon,» manm proporsyonnel Parti Lepep Onorab Maria Payet-Marie ti par egzamp dir, an azoutan ki sa lalwa pou permet adres plizyer kondisyon lasante tel ki lobesite, toksikomani e bann maladi enfeksyez.

Son koleg reprezantan Cascade Onorab Charles Decommarmond ti soulinyen ki sa lalwa i enportan akoz vye lalwa ti’n fini demode. I ti sepandan azoute ki pour li efektiv, fodre ki i pli for ki tou lezot lalwa. I ti donn legzanp Lalwa Prizon ki pa ti donn akse dan prizon a bann travayer lasante.

Bann manm Lasanble ti dakor ki rezilta sa nouvo Lalwa Lasante Piblik pou anmenn en benefis lon term pour Sesel e Seselwa.