‘Valer pour mwan, valer pour nou tou’ |03 October 2015

Oktob i ganny dedye a ‘determinasyon’

Determinasyon i valer ki’n ganny swazir pour mwan Oktob anba progranm ‘Valer pour mwan, valer pour nou tou’ lanse par Konsey Nasyonal pour Lazenes (SNYC) komansman lannen.

SNYC an kolaborasyon avek sa platform ki regroup bann lorganizasyon non- gouvernmantal, Ceps (Citizens Engagement Platform Seychelles) ti lans valer determinasyon atraver en legzibisyon yer.

Sete Manmzel Lissa Labiche ki ti ofisyelman lans sa valer e ouver legzibisyon kot Orion Mall dan prezans sekreter prensipal pour lazenes Alain Volcère, sekreter prensipal pour zafer sosyal Linda William-Melanie, sef egzekitif SNYC Alvin Laurence, tyermenn Everlasting Love Ministry (ELM) Jude Fred, parmi bann zofisye SNYC ek bann manm CEPS.

Atlet Lissa Labiche, ki osi en zenn manman, ti dir son pli gran sakrifis ti pour li kit son zanfan Praslin pour li kapab kontinyen pratik son disiplin sportif me la aprezan i satisfe avek son rezilta ek performans  vi ki in dedye tou pour son zanfan.

I ti osi dir ki i vreman fyer pour reprezant bann zenn e menm si ou vin en manman sa zanfan pa vin en baryer e ou kapab pratik spor ouswa bann lezot aktivite akoz napa nanryen ki enposib avek determinasyon.

Bann lorganizasyon ki ti la pour prezant zot bann proze dan legzibisyon yer bomaten i osi form parti Ceps. Sa ti enkli SNYC, ELM, Care, e Women in Action and Solidarity (WASO).

Pandan sa seremoni en ansyen pasyan sant byennet ti donn en temwayaz lo lafason ki i ti’n perdi lespwar me avek determinasyon ek sipor in reisi fer fas avek tou son defi.