Follow us on:

Facebook Twitter LinkedIn YouTube

Archive -Religion

Zenn i onor Bondye dan en konser gospel |31 August 2015

Dan kad Festival Lazenes ki ti deroul pandan semenn e wikenn pase, en group zenn ti zwenn ansanm Sanmdi apremidi pour zot onor Bondye.

Sa ti dan en konser gospel ki ti deroul dan lasal konferans Seychelles Trading Company (STC).

Pour sa konser, bann zenn ti swazir  tenm ‘meditasyon’. Sa i dapre Liv Joshua,  sapit 8, ki tradwir koumsa :

«Sa liv lalwa pa pou kit ou labous, me ou pou medit lo la lizour konman lannwit. Akoz dezorme ou pou fer ou semen prospere e ou pou ranport gran sikse».

Atraver son benediksyon, Reveran Christine Benoit ti fer en refleksyon lo sa tenm.  I ti dekri li koman en defi pour tou bann zenn akoz Joshua se sa enn ki ti siksed Moïse koman dirizan pep Israël. Dan labsans Moïse, i ti kontinyen, Joshua ti bezwen limenm konnen koman pour diriz pep Israël e rann li prosper. Se atraver parol Bondye, ki i ti ganny sa konfyans.

«Parol Bondye i devret sa lenstriman ki diriz nou toulezour. Pour pli byen konpran parol Bondye fodre medit lo la,» Reveran Benoit ti dir bann zenn.

Sa konser gospel ti vwar partisipasyon Jean Ally, Legliz Lapannkot, Inquisitive, lakoral Lasante e Emerge Group.

Bann portre ki akonpanny lartik i montre en pe lanbyans pandan sa konser.

 

 

 

 

 

» Back to Archive