Follow us on:

Facebook Twitter LinkedIn YouTube

Archive -Youth

Lazenes pou selebre 250-an premye letablisman Sesel |31 August 2015

Ankor dan senk an, le 27 Out 2020, pou fer 250-an depi ki bann premye zabitan Sesel ti etabli zot lo zil Ste Anne. Atraver Konsey Nasyonal Lazenes (SNYC), bann zenn in angaz zot pour konmemor sa gran levennman.

Alokazyon 245enm premye letablisman Sesel Zedi pase, en group zenn ti fer sa langazman kot lasal konferans Seychelles Trading Company (STC). Sa seremoni, ki form parti Festival Lazenes, ti deroul dan prezans Vis-Prezidan Danny Faure ki osi annan portfolio lazenes, sekreter prensipal pour Lazenes Alain Volcère, tyermenn SNYC Ziggy Adam, son sef egzekitif (CEO) Alvin Laurence e depite sef egzekitif Ghislaine Belmont.

Sa langazman ki sa bann zenn in fer in osi tonm dan kad selebrasyon valer ‘komitman’, ki zot pe selebre pandan mwan Out.

Lo non son bann koleg, en manm bord SNYC Bryna Felix ti fer rapel an 1756 kan kaptenn Corneille Nicholas Morphey ti pran posesyon Sesel lo non Lerwa Lafrans e 14-an plitar, le 27 Out 1770, kan premye zabitan ti debark lo zil Ste Anne. Sa, i ti azoute, ti mark nesans lepep Seselwa.

Manmzel Felix ti fer remarke ki bann zenn i rekonnesan anver nou bann zanset, ki malgre bokou difikilte ek lobstak ti poz fondasyon nou nasyon e kontribye pour anmenn Sesel kot in arive ozordi.

I ti dir ki sa pa devret zis en memwar, me ki i devret fer bann zenn pli determinen pour fer zot prop kontribisyon e pour ki atraver langazman ki zot in fer Zedi, zot kapab fer sikse alavenir.

I ti ensiste ki kalite lavi ki zot anvi viv pa depan lo loportinite, me plito lo konman zot pran sa bann loportinite.

Pandan seremoni, plizyer group zenn ti prezant zot komitman ek vizyon pour sa prosen senk an. Bann ant 15 e 20-an in promet pour reste ferm anver zot ledikasyon. Sa ki annan ant 20 e 25-an in angaz zot pour vin bann profesyonnel lo nivo nasyonal osi byen ki enternasyonal. E bann ki aze parlao 25-an pou ede enspir e fer en diferans positiv dan lavi lezot zenn, pandan ki zot kontinyen devlop zot prop kapasite.

 

 

 

 

 

» Back to Archive