NRA i selebre 15-an legzistans |31 August 2015

Neighbourhood Recreational Activities (NRA), en progranm ki ankadre bann bon valer viv ek lanmitye  parmi bann zenn dan distrik anba sipervizyon bann adilt responsab, in ariv lo son 15enm lannen depi ki i ti ganny lanse ofisyelman an Out 2000 dan Palais des Sport, Roche Caiman.

Pour selebre sa lakonplisman, Minister Zafer Sosyal, Devlopman Kominoter ek Spor an kolaborasyon avek lasosiasyon ki regroup tou bann mouvman NRA dan distrik lo Mahé, Praslin ek La Digue ti organiz en resepsyon pour rekonpans bann animater volonter ki’n ede pour ankadre bann zenn ant 5-an a 15-an dan tou distrik.

Moto NRA i ‘Zanmi pour touzour’.

Sa aktivite, ki ti deroul Vandredi pase kot restoran Harbour Light, Maison Du Peuple, ti vwar prezans konseye spesyal dan Minister Zafer Sosyal, Devlopman Kominoter ek Spor Dan Frichot, tyermenn konsey nasyonal  NRA Raymonde Lavigne, Reveran Daniel Kallee, ki ti osi zwenn minister plitar pour ede dan lenplimantasyon sa progranm, bann lezot manm konsey nasyonal NRA, bann ankadrer ek lezot envite.

Apre benediksyon par Reveran Kallee, tyermenn Lavigne ti swet sa anviron 150  ankadrer volonter en bon lakonplisman 15-an.

“NRA in evolye e in reisi bokou. In reisi propaze partou dan sosyete. Zanfan NRA nou kapab dir ti konmans par zwe toupi, lastik, larou, lakord e la avek modernizasyon avek konpiter. Zanfan NRA apard ki zot  kontinyen pratik nou bann zwe ek ladans tradisyonnel, zot vwar zot pe fer resers e pe servi plis bann teknolozi modern ki mon vwar nou bann ankadrer zot bezwen met zot azour zot osi avek sa bann tel teknolozi,” Manmzel Lavigne ti dir.

I ti osi felisit bann ansyen amimater volonter ki’n arete pour en rezon ou en lot, pour zot bon travay ki zot in fer pour ed bann zenn.

par tyermenn Lavigne ek Msye Frichot, senk ankadrer volonter ki’n fer 15-an avek NRA -- Militna Marie, Anne Barbe, Maggie Thomas, Sidna Antat ek Therese Leon -- ti ganny loner pour koup gato pour sa lokazyon.

NRA ti ganny konsevwar par Msye Olsen Vidot ek Msye Frichot, de travayer minister ki ti ansarz gouvernman lokal sa letan, avek bi anpese ki bann lefe negativ globalizasyon pa afekte nou bann zenn.

Sa konsep NRA ti lanse konman en proze pilot dan sis distrik an Mars 1999 kot i ti mars vreman byen kot lezot distrik ti a pe espere pour akeir sa proganm.

“Nou pa ti anvi ki lenfliyans negativ ayer i annan en lenpak lo nou kiltir e osi lo fason viv ek lanmitye dan nou bann zenn sa letan kot ziska ozordi kot nou’n vwar progranm renesans sosyal in antre kot ansanm nou ankor pe debat pour refer retournen sa bann bon valer viv, lanmitye ek tolerans ki serten proporsyon nou popilasyon in vwar zot perdi. Sa progranm in osi ed nou pour dekouver lekel fanmir ki bezwen lasistans soyal, si en zanfan i bezwen latansyon spesyal lo nivo ledikasyon, lasante e tou sa zis par zot bann konportman ki ganny obzerve par nou bann animater parfwa dan NRA,” Msye Frichot ti dir.

I ti osi fer remarke ki napa preski ditou bann msye ki pe ede dan progranm NRA e i ti profite pour demann bann msye pour vin devan pour donn en koudmen sa bann madanm anver fitir bann zenn pour demen.

“Mon vreman fyer ler mon vwar e osi aprann ki i annan bann zenn ki  dan zot 20 a 30-an la ki’n pas dan NRA ki ou vwar zot pe byen progrese dan zot ledikasyon, lavi familyal e menm i annan ki pe menm donn NRA koudmen dan lenplimantasyon son program,” i ti azoute.

Militna Marie sorti distrik Grand Anse Mahé, en ansennyan par profesyon e osi en animater ki’n fer 15-an dan NRA, ti dir avek zournal Seychelles Nation ki vi dan son profesyon in toultan kontan zanfan, kontan ed zanfan, se sa ki’n vwar li ankor la pe donn son letan pour bann zanfan. Sa i  en satisfaksyon pour li ler i vwar zanfan ki in travay avek i grandi byen, zot annan lanmour e lanmitye antre zot e ki zot vin bann bon legzanp dan la sosyete.

I ti dir ki i pou kontinyen fer sa travay pour bann zenn e i ankouraz lezot pour zwenn e ede dan devlopman bann zenn.