Follow us on:

Facebook Twitter LinkedIn YouTube

Archive -Youth

Konferans i diskit lazenes ek lanplwa |28 August 2015

Pour ede redwir lakantite zenn ki san en lanplwa Minister Lanplwa ek Devlopman Resours Imen pe al revwar zot bann progranm nasyonal ki ede plas bann zenn dan lanplwa, Minis Idith Alexander in anonse.

Minis Alexander ti dir sa pandan louvertir en konferans lo lazenes ek lanplwa dan prezans Vis-Prezidan Danny Faure, ki osi responsab departman lazenes, plizyer minis ek sekreter prensipal, manm kor diplomatik, dirizan lopozisyon dan Lasanble Nasyonal, bann manm Lasanble Nasyonal, osi byen ki bann responsab ek travayer lazenes e plizyer zenn.

In dir ki sa linisyativ i anliny avek nouvo progranm ki Predizan James Michel ti anonse dan son diskour pour Lazournen Nasyonal, kot gouvernman pou pey 40% saler bann zenn ki anploye dan sekter prive. Sa i ava osi ankouraz bann zenn pour rode e reste dan lanplwa.

“Nou’n rekonmans revwar sa de progranm formasyon pour bann zenn anba Employment training scheme e aparti boner lannen 2016, nouvo konponan pou ganny azoute pour fer sa progranm vin pli relevan avek larealite ozordi, sirtou avek demann ki annan lo marse lanplwa pour bann zenn,» i ti dir.

Bann nouvo propozisyon ki sa minister pe konsidere i zwenn sa de progranm anba Training scheme ansanm pour vin en sel progranm, ranforsi formasyon jobseekers ki deza annan kalifikasyon dan en domenn me sa skil nepli an demann lo marse lanplwa e dirasyon formasyon i vin pli fleksib baze lo kalite lendistri ek domenn dan ki formasyon pe ganny antreprann.

Alawenns pou osi ganny revwar e sertifika ki bann partisipan i resevwar pou ganny rekonnet lo National Qualification Framework (NQF).

« Nou bi prensipal se met en lafen avek sa leskiz ki bann zenn pa pe kapab travay akoz zot napa leksperyans,» i ti azoute.

Sa skim ki pou apel My first job pou pran lefe le premye Zanvye 2016  e i pou osi aplik pour bann zenn ki’n termin bann lenstitisyon pos-segonder ki anvi fer zot prop pti biznes.

Bann zenn ti ganny loportinite pour diskit zot laspirasyon, defi ek lespektasyon lo lanplwa dan nou pei dan sa konferans ki ti fer yer kot Sant Konferans Nasyonal.

Direkter polisi ek resers, Susan Morel, ti prezant rezilta preliminer en resers lo lanplwa bann zenn ki ti ganny fer par Liniversite Sesel (UniSey).

Bi sa letid ti pour ganny en apersi lo lazenes ki dan lanplwa, espesyalman lakoz ki bann zenn pa pe travay dan pei. Lazenes in ganny targete akoz zot ki reprezant mazorite popilasyon ki pa dan lanplwa.

Sa resers, ki pou ganny valide lafen sa lannen, i en lisinyativ Minister Lanplwa  ek Devlopman Resours Imen an kolaborasyon avek Lorganizasyon Enternasyonal pour Lanplwa (ILO).

 

 

 

 

 

 

 

» Back to Archive