Sekretarya Lasanble i fer en donasyon Prizon Montagne Posée: ‘Prizon pa en lotel senk zetwal’ |01 August 2015

En group staf sekretarya Lasanble Nasyonal in fer en donasyon avek Prizon Montagne Posée.

Sa ti pandan en pti vizit ki sa group travayer Lasanble ti fer kot sa letablisman yer apremidi e kot zot ti dekouver ki «prizon pa en lotel senk zetwal».

Se responsab komite sosyal Lasanble Luisa Waye-Hive ki ti remet sa donasyon – ki konpri  bann lekipman sportif e diferan zwe – avek sef sirentandan prizon Maxime Tirant.

Dapre Manmzel Waye-Hive, menm si konman sekretarya Lasanble zot konnekte avek sa ki pe pase an zeneral, zot ti toultan anvi al vizit prizon pour zot vwar larealite pour zot menm.

I dir ki zot ti sirtou kirye pour konnen si sa persepsyon lotel senk zetwal ki serten dimoun i annan lo prizon i vre.

I azoute ki zot pa ti oule zis fer en vizit, me osi fer en pti zes pour ede amelyor lavi bann prizonyen.

Se pour sela ki zot in sakenn kontribye pour kapab fer sa pti donasyon, ki Manmzel Waye-Hive i dir a donn zot en fason detann, sirtou bann ki reste anndan. In osi fer remarke ki zot in swazir bann lekipman ek zwe ki a ede  donn zot lespri lekip e montre zot ki zot pa alekar, ni tousel».

Sef sirentandan Tirant ki ti aksepte sa donasyon lo lapar prizon, ti remersye bann manm sekretarya Lasanble pour zot kontribisyon.

I ti eksplik zot bann diferan travay ki bann deteni i fer dan prizon.

Pandan zot vizit Montagne Posée, sa group travayer Lasanble ti osi ganny sans vizit bann fasilite kot sa prizon, tel ki lasal legzersis, lasal spektak, stoudyo lanrezistreman ek bann latelye travay.

Alafen vizit, Manmzel Waye-Hive ti deklare ki la ki zot in trouve pour zot menm konman bann prizonyen i travay e viv an zeneral, zot aprezan nepli annan sa persepsyon  ki prizon i en lotel senk zetwal parey zot ti’n tande.