En nouvo plan trafik pour Victoria |31 July 2015

Departman transpor in anons en nouvo plan trafik pour Victoria. Se Minis pour Zafer Etranzer ek Transpor Joel Morgan ki ti anons sa plan trafik, oubyen ‘Victoria Traffic Management Plan’ parey i apele an Angle, dan Lasanble Nasyonal mardi.

Sekreter prensipal pour Transpor, Patrick Andre, ti prezant sa plan ki konport trwa kategori – kour-term, mwayen-term e lon-term - avek bann manm lasanble.

Premye faz sa plan, ki baze lo sanzman demografik ek devlopman Victoria, in deza konmans ganny enplimante e son trwazyenm faz i ekspekte konplete selman apre en peryod 7-an.

Sa lenvestisman mazer i reprezant en kou total 2.1 bilyon roupi.

Dapre Minis Morgan, konmansman lenplimantasyon kour-term sa plan, ki’n enkli lenstalasyon plis lalimyer trafik e azout koulwar dan serten semen, in deza amelyor sirkilasyon trafik dan Victoria. Sa i sirtou lo Laveni 5 Juin, dan Lari Albert, Lari Olivier Maradan, krwaze Bel Eau ek Bel Air, Plaisance ek Roche Caiman.  

Sa premye faz in osi konpri konstriksyon ronpwen Union Vale kot Radyo Sesel, amelyorasyon ron pwen Le Chantier, konstriksyon parking kot lekol Bel Eau, fer trafik diriz dan en sel direksyon Lari Francis Rachel e sanz direksyon trafik lo Lari Castor.

Serten lezot proze in deza konmanse, parey lyen ant Ile perseverance ek Ile Aurore ki pou osi konnekte avek Anse Etoile ek La Retraite. De lot lyen pe aktyelman ganny konstri avek Ile Soleil, enn pour konnekte avek Anse Aux Pins e lot avek bout erport. En lot lyen pou konstri plitar dan zanmerant Care Free Guest House.

I osi annan plan pour zwenn Ile du Port avek Mahé par de lezot pon -- enn apartir Union Vale e lot depi batiman Espace. Lezot proze ki pou enplimante dan sant lavil i enkli met lalimyer trafik dan krwaze Bel Eau, met de koulwar avek trotwar Lari Hangard, Lari Quincy ek Lari St Joseph. Kant a Laveni Revolisyon, in prevwar ki i pou annan trwa koulwar.

Departman Transpor pe osi prevwar bann mezir pour amelyor trafik dan krwaze Bel Air e dan Lari Labourdonnais. Serten porsyon semen St Louis pou grandi, an partikilye dan krwaze Stevenson Delhomme. Semen Stevenson Delhomme limenm pou osi grandi.

Parmi lezot proze pli lon-term, i annan plan pour azout ankor de vwa depi Providence e fer sa ‘dual carriage way’ ou ‘highway’ ki konmans kot erport,  kontinyen ziska lavil. Pour evit risk aksidan, larantre ‘Intelvision’, ‘Airtel’ ek lezot biznes dan sa rezyon pou apartir en nouvo semen paralel, e ki – kontrerman a konmela - pou konnekte avek grannrout a en sel pwen.

Avek bi rezourd problenm sirkilasyon trafik Pointe Larue ek Anse Aux Pins, semen pou osi amelyore ziska Anse Royale e en ron pwen pou konstrir dan larantre erport.

Pou osi annan en lot ronpwen kot nouvo  ‘supermarket’ STC (Seychelles Trading Company), ki ekspekte ouver lo Laveni Bois de Rose.

Pour ede deblok trafik lo semen Mont Fleuri e pour fasilit sirtou bann transpor ki al dan sid ou lo Nouvo Por, en lot semen sorti dan krwaze Forêt Noire i kapab vin zwenn avek sa ronpwen. Anmenmtan, krwaze lopital pou amelyore avek en lot koulwar ki pou al ziska Le Chantier.

Proze pli gran e pli anbisye i reste en semen ki pou konnekte Anse Etoile ek Roche Caiman, an pasan par Ile Aurore, Ile Perseverans ek Ile du Port. Sa proze, ki apel ‘Victoria bypass’  e ki pou kout 150 milyon roupi,i ekspekte zwe en gran rol pour rezourd problenm trafik dan Victoria, akoz transpor ki sorti Anse Etoile pa pou bezwen travers lavil pour al dan Sid.

Pour bann ki sorti Beau Vallon ek St Louis, i pou annan de posibilite : swa pou fer zot pas par Lari Hangard, oubyen par en nouvo semen ki a zwenn Stevenson Delhomme ek Bel Air.

Dan en lot demars pour redwir sirkilisayon ek problenm konzesyon trafik dan Victoria, departman transpor in dir ki i pe kontinyen travay lo en sistenm ‘park and ride’ ki a ankouraz motoris pour kit zot transpor andeor lavil e pran en bis pour al dan lavil. Sa departman in azoute ki sa servis i bezwen ganny akonpannyen par lezot eleman, par egzanp de parking, enn dan nor e enn dan sid, e en servis bis avek en pri rezonnab ant le de. Landrwa ki’n ganny idantifye pour sa de parking i Ile du Port kot depo SPTC (Seychelles Public Transport Coorporation) e Roche Caiman kot Stad linite.

Dan lefitir, i pou osi annan nesesite revwar sistenm e pri parking dan Victoria. Gouvernman pe menm etidye posibilite pour ki serten veikil ki zot prezans dan Victoria pa endispansab, i pey en tiket pour antre dan lavil. I pe osi revwar lezislasyon pour asire ki konstriksyon bann nouvo batiman i fer provizyon pour parking.

Plan trafik Victoria pe ganny enplimante an kordinasyon avek Minister Litilizasyon Later ek Lakaz (MLUH), ki li i annan en plan zeneral pour devlopman lavil ki ganny konsidere konman pli pti kapital dan lemonn.