Konkour Pri Distrik Kiltirel - 14 distrik in konfirm zot partisipasyon |01 July 2015
Katorz distrik in konfirm zot partisipasyon dan konkour Pri Distrik Kiltirel ki pou fer pour premye fwa sa lannen, Minis pour Tourizm ek Kiltir Alain St Ange in dir.
Pri Distrik Kiltirel ti lanse an Novanm 2013 e i ti ganny inisye avek bi pour fer bann distrik pran konsyans bann larises kiltirel lo zot teritwar, dan zot distrik e dan zot vwazinaz e ankouraz zot pour met an valer sa bann resours.
«Minister ti anvi anmenn bann distrik e pei antye pour konpran valer sa bann resours kiltirel e osi zot potansyel ekonomik dan sa moman kot pei pe avanse dan domenn touris kiltirel osi byen ki lendistri kiltirel,» Minis St Ange ti dir dan sesyon demann kestyon dan Lasanble Nayonal yer.
I ti pe reponn en kestyon par manm parti mazoriter Maria Payet Marie ki ti’n demann li en update lo sa konkour.
Minis St Ange i dir 20 distrik ti soumet en premye levanter zot bann resours kiltirel e sa i fer ki minister in pli byen konn sa larises kiltirel ki nou pei i annan e prezan i reste pour valoriz e donn vizibilite sa bann larises kiltirel.
«Si Sesel i vreman anvi devlop en lendistri kreatif ki soutenab, bann travay kreativite i bezwen ganny enspire atraver nou kiltir, apartir nou tradisyon ek nou lidantite,» Minis St Ange ti fer resorti.
I ti azoute ki bann distrik zot baz rezidansyel nou pep e zot annan en rol kle pour gard nou kiltir vivan e fer li epanouir.
«I enportan ki sa i tre kler sinon sa Konkour Pri Distrik Kiltirel pa pou fer okenn sans me i pou zis en senp aktivite ki pou konmanse, ki pa dire e pa fer gran lefe,» Minis St Ange ti fer resorti.
I ti enform lasanble ki apre lansman sa konkour an Novanm 2013, son minister in met anplas en komite teknik ki enkli ziri avek partisipasyon departman devlopman kominoter ki pe fer swivi lo sa konkour.
In osi annan plizyer sesyon travay ki sa komite in fer avek bann distrik a plizyer nivo enkli rezyonal.
Komite teknik pe aprezan travay avek sa bann distrik pour met anplas bann komite kiltirel pour donn sipor bann administrater distrik avek lenformasyon ek gidans e resours ki zot pou bezwen lo fason pour organiz zot partisipasyon dan konkour.
Dan sa prosesis, serten distrik in rankontre difikilte e akoz sa zot in retir zot partisipasyon dan premye edisyon sa konkour.
Aprezan i annan 14 distrik ki’n konfirm zot partisipasyon dan premye edisyon sa konkour e sa se Takamaka, Anse Royale, Au Cap, Cascade, Mont Fleuri, Bel Air, Beau Vallon, La Digue, Baie Ste Anne Praslin, Anse Boileau, English River, Baie Lazare, Bel Ombre e Grand Anse Praslin.
Seremoni prezantasyon pri i ekspekte fer Vandredi le 13 Novanm 2015.