Kretyen i selebre Lapannkot dan nouvo parwas Perseverans |25 May 2015

Dapre Labib zour Lapannkot en bon group dimoun ti reini ansanm dan en menm landrwa.
Sa pa ti en leksepsyon yer lo zil Perseverans kot en gran lafoul kretyen sorti partou lo Mahé ti rasanble andeor nouvo lasapel pour swiv lanmes.

Bann organizater ti konnen ki Lasapel Lespri Sen, nou lasapel lo zil Perseverans ki ti ganny inogire Dimans le 22 Mars par Monsenyer Denis Wiehe, levek parwas Victoria, pa ti pou kapap tenir sa kantite dimoun alors zot ti’n prepar landrwa deor pour akey bann kretyen.

Monsenyer Wiehe, asiste par tou bann pret ek dyak katolik, ti anim sa gran rasanbleman bann dyosezen pour ini bann katolik alokazyon lafet Lapannkot.

Lapannkot – ki vedir '50 zour' i zisteman ganny selebre 50 zour apre Pak pour konmemor lalyans ant Bondye avek pep Izrael.
Pandan sa selebrasyon lanmes yer, priyer iniversel ti ganny lir dan plizyer langaz tel ki  Kreol, Angle, Franse, Arab ek Endyen.
Sa selebrasyon lanmes ti al pour 2erd-tan 30 minit.
Lanmes ti swiv par lavant plizyer kalite manze, lobze ek zartifay.

Lanmes Lapannkot yer ti atir en gran nonm kretyen