I dan plan gouvernman pour met pano soler lo lakaz ek batiman piblik |16 April 2015

I dan plan gouvernman pour met pano soler pa zis lo bann lakaz ek biro gouvernman me osi lo lezot batiman lo Mahé, Praslin ek La Digue.

Minis responsab pour Lanvironnman, Sanzman Klima ek Lenerzi, Didier Dogley, in dir sa dan sesyon demann kestyon dan Lasanble Nasyonal Mardi ler i ti pe reponn en kestyon par manm elekte pour distrik Grand Anse Mahé, Lenny

Sesyon Lasanble Mardi ti dernyen pour sa trimes akoz apre sa Lasanble in al dan recess.
Msye Lebon ti’n demann Minis Dogley si i dan plan gouvernman pour met pano soler lo bann lakaz ek biro gouvernman.

“An se moman i annan en proze finanse par Fond Global Pour Lanvironnman (GEF) ek gouvernman Sesel ki pe ganny enplimante par mon minister ki pe target met pano soler lo twa bann batiman lo Mahé, Praslin ek La Digue,” Minis Dogley ti eksplik bann manm lasanble.

I ti fer rapel bann manm ki anba sa proze i annan sa rebate scheme ki pou ed dimoun finansyerman pour ki zot kapab envestir dan bann sistenm fotovoltaik.
I ti dir sa scheme ki Labank Devlopman Sesel pe administre pe finanse par gouvernman Sesel osi byen ki GEF.

“Ler sa scheme ti lanse lannen pase ti annan 7.8 milyon roupi dan sa fon kot Minister Finans ti’n met 3 milyon roupi e GEF ti’n met 4.8 milyon roupi,” Minis Dogley ti fer remarke.

I ti azoute ki gouvernman pou met ankor 4 milyon roupi dan sa fon pour siport sa scheme.

Minis Dogley i dir ki dapre rapor Labank Devlopman boner sa lannen, plis ki 1 milyon roupi dan sa fon 7.8 milyon roupi in fini ganny peye avek bann konsomater ki’n enstal pano soler lo zot batiman.

“Sa linisyativ pe kouver konsomater dan sekter rezidansyel e osi byen ki sekter biznes,” Minis Dogley ti dir.
I ti osi fer remarke ki i annan plis ki 1 megawat sistenm fotovoltaik ki’n fini enstale isi e mazorite i lo Mahé kot laplipar in ganny mete dan landrwa  rezidansyel me mazorite kapasite i ganny kouver par sekter komersyal.

Minis Dogley in eksplike ki sa rebate scheme pou kontinyen e si i annan larzan ki reste sa pou servi pour kontinyen promouvwar devlopman fotovoltaik isi.

“Pour lemoman napa en scheme pour bann biro gouvernman me i dan plan mon minister pour devlop enn pour bann biro gouvernman ek batiman piblik.”

I ti osi dir ki ziska prezan i annan plizyer lorganizasyon gouvernmental parey Labank Santral, batiman Fon Pansyon Unity House, PUC Electricity House, lekol Grand Anse Praslin ek Aldabra ki’n fini met en sistenm anplas. Lezot proze ki pe ganny devlope i solar homes ki pou target bann lakour avek reveni ki ba pour ed zot redwir zot kou elektrisite. Pour sa proze, gouvernman pe rod led avek gouvernman Endyen.  

En lot proze i solar schools ki pou ed bann lekol piblik redwir zot kou elektrisite e pour sa  en propozisyon in ganny soumet avek gouvernman Sinwan depi lannen pase.

Anplis ki sa Minis Dogley i dir gouvernman Sinwan pe konsider donn Sesel 800 lalimyer soler ki pou ganny mete partou lo Mahé, Praslin ek La Digue.
Minis Dogley ti osi dir ki apard tousala gouvernman in osi konmans en proze avek GEF kot i pe analiz lefikasite litilizasyon lenerzi dan pei.