Follow us on:

Facebook Twitter LinkedIn YouTube

Archive -President Michel

‘Seselwa ler in arive pour pran ou lekonomi dan ou lanmen e fer li marse’ |27 February 2015

Apre ki i ti’n pronons diskour lo leta lanasyon yer dan Lasanble Nasyonal  e deklar leta lanasyon konman prosper, pe bouze a en vites san presedan, Prezidan James Michel  ti dir apre avek lapres ki mesaz pli enportan son diskour pour tou Seselwa se ki  “ler in arive pour pran ou lekonomi dan ou lanmen e fer li marse e kre larises pour ou,  ou fanmir e pour ou pei”.

“Mon kwar lemoman in arive apre sa transformasyon ki’n arive Sesel apre reform 2008, ki ozordi Sesel in ariv en staz kot i bezwen son Seselwa pour pran ownership son lekonomi,” Prezidan Michel ti dir.

I ti azoute ki Seselwa i devret met li pare pour pran ownership son lekonomi ki swa lo lanmer ou lo later.

“Se pour sa rezon ki mon’n dir ki nou ti bezwen kapital etranze pour kapab ed nou  pour konmanse, pour kapab ed nou anmenn lenerzi dan nou lekonomi e dan nou devlopman. Me ozordi nou’n ariv en staz kot Seselwa limenm i devret pran son lekonomi e fer marse e debourye,” Prezidan Michel ti eksplike.

I ti fer resorti ki i pour sa rezon osi ki in anons serten bann zouti ki pou kapab empower Seselwa plis pour li kapab devlop son lekonomi e sa i enkli sa Lalwa pour  Motivasyon Pti ek Mwayenn Antrepriz  (Small and Medium Enterprise Incentive Act) ki byento pou ganny pibliye e ki pou donn Seselwa serten konsesyon e mwayen pour devlop son biznes.

“Nou pe osi met a zot dispozisyon plis kredi pour permet zot antre plis dan bann aktivite ki annan pour fer avek devlopman lekonomi ble tel parey lapes, aktivite touristik e tou lezot ki lye avek lanmer osi byen ki lagrikiltir e lezot ankor.

Me fodre ki Seselwa i sezi tou sa bann loportinite, i serye, i travay, i leve e i debourye e gouvernman pou donn li tou sa sipor e met a son dispozisyon tou mwayen pour li kapab fer sa,” Prezidan ti dir.

 

 

 

» Back to Archive