Lenstiti Kreol i devwal son bann proze pour sa lannen |15 January 2015

Bann envite distenge dan en portre souvenir anba lavarang Lenstiti Kreol zour sa lenstiti ti vin enternasyonal (Madanm Choppy i agos dan portre). Sa lenstiti pe anvizaz plizyer proze sa lannen si mwayen ek resours finansyel i permet

Lenstiti Kreol in devwal serten parmi son bann proze ki i anvizaze realize sa lannen si mwayen ek resours finansyel i permet.

Direktris sa Lenstiti, Madanm Penda Choppy, ti dir sa letan i ti pe prezant serten  bann proze pandan rankont anyel Minister Tourizm ek Kiltir Mardi.

Sa lenstiti i tonm anba sa minister.
Madanm Choppy in dir ki depi ki Lenstiti Kreol in vin enternasyonal lannen pase son misyon in vin pli larz e pli o nivo  e i neseser annan plis dimoun dan sak bann younit ki’n ganny met anplas pour ed li realiz son bann proze dan kad son misyon.
 
“Pour lemoman i pa posib pour nou akonpli nou misyon parey nou sipoze avek sa tre pe resours imen ki nou annan,” Madanm Choppy ti dir.

I ti azoute ki i dan plan stratezik sa lenstiti pour ogmant kantite travayer ki neseser me sa plan, ki’n deza aprouve, i ankor pe esper finansman neseser pour vin anfors.

Formasyon resours imen i osi en lot defi ki Madanm Choppy i dir pou ganny adrese dan san plan.

Madanm Choppy in toudmenm fer resorti ki sa lenstiti i aprezan bezwen resours imen avek pli o degree formasyon.

“Nou bezwen sifizanman finansman avek loportinite formasyon pour nou kapab ariv lo sa nivo ki nou anvi,” Madanm Choppy ti fer resorti.

I ti azoute ki Lenstiti Kreol, ki annan sipor gouvernman e striktir neseser, i anvi vin sa lotorite dan domenn resers, literatir, lengwistik Kreol dan larezyon.

Madanm Choppy ti osi dir ki sa lannen Lenstiti Kreol i anvi fer plis marketing pour son bann prodwi ek servis e osi kre lezot servis ki pou ankouraz dimoun dan tou kous  sosyete pour apresye sa ki zot fer e osi pour vin akse son bann servis ki i ofer.

Dan kad son bann proze pour devlop zouti lalang, Madanm Choppy i dir ki Lenstiti Kreol i ankor pe travay lo son proze diksyoner monoleng e la in fini en faz e i ekspekte konplet li dan ankor 2-an.

Lenstiti i osi fek termin dernyen volim leksik.
Lenstiti Kreol, ansanm avek departman teknolozi lenformasyon (DICT) pe osi travay lo son sit web dan kad son proze pour devlop son bann zouti teknolozi lenformasyon e sa i ekspekte pare pou lanse byento.

En lot proze ki Madanm Choppy i dir i dan en staz avanse i en sistenm korize pour Kreol Seselwa ki pe fer avek Microsoft e DICT.
En proze Pri Antoine Abel rezyonnal i osi an kour e Madanm Choppy i dir ki sa pa tro fasil me demars pe ganny fer.

Pandan sa lannen Lenstiti Kreol i osi anvizaze ranforsi son bann lyen avek tou son bann partener ek kolaborater enkli Minister Ledikasyon e deza in siny en lagreman avek Liniversite Sesel (UniSey) pour fer bann travay entelektyel e akademik e la i pe travay lo en lagreman avek Minister Ledikasyon pour plis kolaborasyon.

I pe osi anvizaze devlop en lagreman dan domenn resers avek en liniversite Swedwa.

I ti azoute ki serten laspe Lenstiti Kreol Enternasyonal in deza pe ganny met an plas e i osi annan proze pour konstrir en nouvo batiman ki a permet sa lenstiti servi sa vye batiman konman en lasal lekspozisyon e nouvo batiman pour permet tou bann lezot pei annan zot prop seksyon.

Lenstiti Kreol ti vin otononm an Avril lannen pase apre ki Lasanble Nasyonal ti’n aprouv en lalwa lo sa size an Zilyet.