Follow us on:

Facebook Twitter LinkedIn YouTube

Archive -Seychelles

Victoria i eklere pou Nwel ek Lannen! |20 December 2014

Nou pti lavil Victoria in eklere pour lokazyon Nwel ek Lannen e vin pli zoli ki zanmen.
Depi de wikenn pase, tou lari, ronpwen, park piblik, batiman eksetera in dekore swa avek bann gran larb de noël, bononm nwel ou lezot lobze e akseswar ki evok sa peryod  festivite.

Aswar ki pli sile ler bann lalimyer tou kouler e tou laform in alimen e lavil i sanble transformen an en gran park latraksyon oubyen en diskotek ouver.  Dekorasyon Victoria in vin en gran latraksyon pour en gran nonm dimoun ki vin admir labote sa spektak permanan. Bokou i desann an fanmir e bann zanfan i zwe, sotaye e anmize dan bann lespas piblik ki’n vin bann zarden eklere.

Parey in vin en tradisyon aprezan, dekorasyon lavil Victoria pandan sa peryod i linisyativ Biro Mer Lavil. Sa lannen, in menm annan en zefor pou annan plis e pli zoli dekorasyon.

Me Mer Lavil Victoria Madanm Jacqueline Moustache-Belle in eksplike ki sa zoli dekorasyon pa ti pou posib san partisipasyon bann biznes. Pour sa lokazyon, serten biznes in menm adopte en landrwa dan Victoria.

«Nou’n resevwar bokou sipor sorti kot diferan biznes. Serten in donn larzan pour dekor bann lespas ver. Sa lannen nou’n osi promot lide kot bann biznes i adopte en landrwa. Epi bann biznes in dekor zot prop landrwa,» Mer Lavil in dir.

Menm si sa bann lorganizasyon i fer sa dapre zot prop volonte, Madanm Moustache-Belle in anonse ki zot zefor pou antre dan en konpetisyon, avek en prezantasyon pri ki pou fer an Zanvye lannen prosenn.

«Nou kontan dimoun i fer sa ofon leker, avek son dimansyon kretyen. Me nou osi annan en komite ki pou ziz bann meyer dekor,» in anonse.

Koman pri, bann gannyan pou resevwar en trofe ki pou reprezant diferan kategori parey batiman, ronpwen, lari, krwaze semen eksetera.

«Nou pa pe donn larzan akoz nou anvi ki zot partisip dan sa lafet relizye e lafet lafen lannen ki pour nou tou,» Mer Lavil in konklir.
Si ou pa ankor desann pour vin regard Victoria aswar, pa ezite pour fer li e anmenn ou zanfan. Pandan bann zour avan Nwel ou pou osi kapab apresye bann zenn Konsey Nasyonal Lazenes (SNYC) ki pe sant karol dan diferan landrwa dan lavil.

Biro Mer Lavil i remersye tou bann sponsor ki’n kontribye dan dekorasyon Victoria sa lannen :

Lotel Four Seasons, Development Bank of Seychelles (DBS), SEPEC, Hunt Deltel, Nouvobanq, Cable & Wireless, Mauritius Commercial Bank (MCB), Victoria Computer Services (VCS), Universal Enterprise, Vijah Construction, Seychelles Commercial Bank (SCB), Seychelles Breweries, lafanmir Harter, Paradis des Enfants, Pure FM, Mary Geers, Senpa, Land Waste Management Agency (LWMA) e Seychelles Trading Company (STC).

Nou profit sa lokzayon pour demann tou dimoun pour pa kas bann dekorasyon akoz i enportan ki nou tou nou partisip aktivman pour ede anmenn lazwa dan leker nou prosen e non pa detri keksoz ki serten i fer dan en fason volonter.

Nou prezant zot serten portre bann dekorasyon tire par nou fotografer Jude Morel.



NOU SWET ZOT TOU EN ZWAYE NWEL EK LANNEN !!

M.S.

 

 

 

» Back to Archive