SPDF i onor bann solda ki’n tonbe |26 November 2014

Parey i en tradisyon depi bokou lannen aprezan, Lafors Defans Pep Seychelles (SPDF) i alokazyon Lazournen Lafors Defans le 25 Novanm onor bann solda ki’n tonbe pandan ki zot ti pe defann nou pei.

Lazournen Lafors Defans i osi rann omaz a bann solda ki ti defann nou e ranport laviktwar lo en group mersener etranze ki ti atak Seychelles le 25 Novanm 1981. Okour sa konba, en zenn solda, soulyetnan David Paul Antat, ti perdi son lavi.

Sa lannen pa’n en leksepsyon kot SPDF ti mark sa lokazyon dan en seremoni depoz kouronn fler kot Moniman Laviktwar kot Erport Pointe Larue yer bomaten.

Akonpannyen par lanmizik Lorkes Nasyonal avan ki i ti premye pour depoz kouronn, sef SPDF Brigadye Leopold Payet ti resevwar salitasyon zeneral avek Gard Doner.  Bann solda ti answit gard en minit silans an memwar bann ero nou nasyon.

Osi prezan ti Komisyoner Lapolis Ernest Quatre, bann ansyen manm Lafors defans, ansyen konbatan dan Dezyenm Ger Mondyal e reprezantan lazenes.

Dan en moman lapriyer, Lomonye Lafors Defans Dyak Louis Agathine ti demann Senyer pour gid bann zonm ek fanm dan liniform pour zot kapab propaz sa trwa gran prensip ki Zezi Kri limenm in prese : Laliberte, legalite ek fraternite. I ti dir ki si nou aplik sa bann prensip nou pou kapab viv dan lape ek linite e vin en pep pli ere e prosper.

Seremoni ti termin par en portre lafanmiy SPDF avek bann envite otour Moniman Laviktwar.