En madanm 49-an i mor apre ki i ganny atake dan son lakaz |26 November 2014

En madanm 49-an, Damienne Morel, ti mor yer granmaten apre ki i ti ganny atake dan son lakaz La Retraite par 2 zonm ki ti’n maske.
Dapre portparol lapolis Msye Jean Toussaint, sa lensidan ti raporte avek lapolis ver 1.25 yer granmaten.

Lapolis i dir sa 2 zonm ti’n fors zot larantre dan lakaz sa madanm apre ki zot ti’n kas vit avek laport devan, ganny akse avek lakle par anndan e ouver laport.

“I paret ki letan sa madanm in konpran ki i annan serten keksoz pe pase sa in alert li e i’n leve e se la ki i’n ganny atake,” Msye Toussaint i dir.
Touzour dapre Msye Toussaint, fiy sa madanm ki aze 20-an li osi in ganny atake dan sa lensidan.

E neve sa madanm, en garson 20-an ki li osi ti pe dormi e ti ganny alerte a en serten moman par sa lensidan, ti tak son lekor dan lasanm pour sap sa latak.
Ler lapolis ti ariv kot sa lakaz zot ti vwar sa madanm ater dan koridor bennyen dan disan e son fiy ti dan sofa dan salon li osi ti annan disan partou lo li.

Se lapolis ki ti ouver laport pour tir sa garson. I paret ki sa fiy ti’n ganny knock out  dapre lapolis e ti apre ki lensidan ti’n fini pase ki i ti repran son souf e alert bofrer son manman ki ti enform lapolis.

Madanm Morel ti ganny sertifye mor sant lasante Rivière Anglaise ver 5er 15 yer granmaten.
Fiy sa madanm in admit Lopital Sesel pour tretman pour son bann blesir tandis  ki son neve in ganny tretman pour sok.
Ziska tar yer lapolis pa ti ankor aret okenn sispe dan sa krim.

Lapolis pe kontiny zot lanket dan sa lensidan kot zot dir i annan posibilite ki enn sa agreser in kapab ganny blese par swa sa madanm oubyen son fiy.
A sa pwen lapolis pa dan en pozisyon pour kapab sertifye si i annan keksoz ki’n ganny vole dan sa lakaz.

Lapolis pe alors lans en lapel avek nenport endividi ou manm piblik ki’n kapab vwar okenn mouvman 2 ou 3 dimoun ki’n dan oubyen pe kit sa zanmerant an vites pour averti lapolis. Zot kapab fer sa direkteman avek biro CID oubyen  atraver telefonn limero anonim lapolis ki 133.

Msye Toussaint pe demann dimoun pour pa ezite pour vin devan si zot annan nenport lenformasyon ki enportan pour kapab ed lapolis dan zot lanket.

Antretan lapolis i dir zot tre konsernen par bann kalite lenformasyon ki  ganny sirkile dan bann lensidan parey ki pa menm ankor ganny sertifye.

Msye Toussaint in lans lapel avek manm piblik ek bann endividi ki pe fer sa pour et pli konsyan e annan plis konpasyon pour fanmir dimoun akoz lenformasyon tou kalite pe sirkile avan menm ki fanmir zot ganny enformen.

Lanmor brital madanm Morel i 6enm ka ki anrezistre sa lannen, Dernyen lensidan kot en madanm ti mor dan en fason osi vyolan ti ka Rita Alphonse an Desanm lannen pase Anse Boileau.