Lafors Defans i demann sipor ek konprenezon kominote |24 November 2014
“Dan Lafors Defans nou parey en fanmir e ler enn nou manm i tonbe nou rod tou fason pour ed li e nou bezwen bokou sipor ek konprenezon kominote pour ed nou akonplir nou misyon,” Dyak Louis Agathine, lomonnye sa lafors, ti dir yer.
Dyak Agathine ti pe koz pandan en lanmes spesyal ki ti’n organize yer bomaten legliz Ste Thérèse Plaisance pour mark konmansman bann aktivite pour konmemor 33enm Lazournen Lafors Defans, kan le 25 Novanm 1981 Lafors Defans Pep Sesel (SPDF) ti repous en lagresyon par mersener etranze.
Tenm Lazournen Lafors Defans sa lannen i : ‘Annou kree en monn kot i annan lape, lazistis ek lanmour’.
Sa rasanbleman reprezantan tou bann younit dan SPDF ek zot fanmir osi byen ki bann parwasyen Plaisance ek bann sorti lezot landrwa, in tonm zour lafet Kris Lerwa Liniver ki osi dernyen Dimans avan ki Legliz i antre dan peryod Lavan.
Dan son lomeli Dyak Agathine ti met bokou lanfaz lo lape, lanmour ek lespwar ki ti osi ganny fer resorti fortman dan bann lektir ek Levanzil.
Enn bann lektir ti tire dan Liv Profet Ezekyel Sapit 34 verse 11 a 17 kot Zezi Kri ti pe anmenn en mesaz lespwar ek lesperans pour en pep ki ti dan difikilte.
“Leson pour nou tou se annou pa kwar ki letan nou dan difikilte tou in fini me ki Senyer i la parey en berze avek bokou responsabilite e i vey lo nou touzour e partou,” Dyak Agathine ti fer resorti.
Lot mesaz enportan ki bann lektir ti fer sorti yer i ki Zezi Kri in vin lo later pour donn son lavi pour tou zonm avek bonn volonte ki fer li konfyans.
“Zezi in donn son lavi pour limanite e bann solda osi zot met zot o servis zot patri ki zot kontan,” Dyak Agathine ti dir.
I ti fer resorti ki bann zonm ek fanm dan liniform zot in angaz zot pour defann zot pei e zot pep atraver zot vizilans e ki sa i en vokasyon.
I ti azoute ki dan sa lafors i ankor annan plas pour zonm ek fanm e i ti profite pour lans en lapel avek bann paran pour ankouraz zot zanfan pour zwenn Lafors Defans me i ti fer resorti ki sa lorganizasyon i enn ki demann bokou disiplin e pour vin en solda i devret en vokasyon me pa zis en travay pour ganny en saler.
I ti osi demann bann paran pour enspir zot zanfan e montre zot bon semen dan lavi, ed zot fer bann bon swa.
I ti met lanfaz lo lefe ki menm si tou imen i annan defo, i annan serten defo ki pa pou zanmen kapab zwenn kriter lafors defans.
“Dan larme pa en landrwa pour dezentoksike e sa i en soufrans pour bann sef larme ler zot bezwen pran desizyon me souvannfwa i annan ki rod fason pour by pass koreksyon e sa pa fer dibyen sa lenstitisyon,” Dyak Agathine ti eksplike.
I ti fer resorti ki ler en zenn i vin dan larme i vin tousel akoz i annan 18-an e ler i kas lalwa i bezwen ganny pini.
“Ozordi nou pe demann zot paran ek kominote pour ed nou pour fer nou lafors vin enn ki for avek bann zonm ek fanm responsab, robis e ki pare a tou moman pour fer sa ki annan pour fer san ki i annan okenn sibstans dan zot lekor ki retard nou. Sanmenm nou pe demann zot dan kominote pour konpran nou misyon ek nou responsabilite,” Dyak Agathine ti dir.
“Ser paran, ler zot zanfan zot anrole dan larme se zot ki anrole e ler aksyon i ganny pran zot bezwen aksepte konsekans le mal ki zot in fer. Wi dan larme nou en fanmir e nou rod fason pour ed enn nou manm ler i tonbe alors les nou bann siperyer pran bann desizyon ki pou byennet nou lafors,” i ti fer resorti.
Zis avan li tyermenn komite responsab pour organiz bann aktivite pour sa lazournen, Lyetnan Kolonnel Emmanuel Larue ti dir : “Nou’n vin dan kominote akoz nou tou bann manm lafors nou sorti dan diferan fwaye dan bann kominote ki nou form parti e ansanm avek zot nou’n vin rann glwar Senyer pour travay ki nou’n akonpli. Nou tou dan nou lavi nou bezwen sa gidans spirityel pour ed nou fer fas a tou bann defi lavi. Nou alor vin demann zot dan kominote pour mazin nou bann solda dan zot lapriyer.”
Apard Dyak Agathine,sa lanmes yer bomaten ti prezide par kire Parwas Ste Thérèse Plaisance Per Pierre e ti animen antyerman par bann zofisye SPDF ki ti akonpannyen par lakoral Notre Dame du Sacré Coeur sorti St Louis ek lakoral Ste Thérèse menm, bann manm mouvman Zezi Vre Zonm ek Brass Band.