En lamars pour dir aret abiz nou zanfan |22 November 2014
En bon nonm dimoun ti partisip dan en lamars atraver lavil yer apremidi pour dir aret abiz bann zanfan e osi eksprim solidarite anver bann zanfan ki pe pas atraver difikilte dan zot parkour pour sirmont defi koze par labi.
Sa lamars ki ti’n organize pour koensid avek 25enm lanniverser Konvansyon lo Drwa Zanfan ti komans dan Stad Popiler, travers Lari Francis Rachel, pas devan Cable & Wireless desann devan Independence House atraver Laveni 5 Zen e al fini dan Mini Stad.
Avan sa lamars ti demare Minis pour Zafer Sosyal, Developman Kominoter ek Spor Vincent Meriton, ki en gran sanpyon drwa zanfan, ti adres tou sa ki ti prezan e met lanfaz lo nesesite pour protez nou bann zanfan.
«Nou’n ralye pour nou mars kont labi lo bann ki feb e nou pe mars kont bann ki pe kapitaliz lo febles nou bann pti inosan,» Minis Meriton ti dir.
«25-an pase nou ti fer en promes pour fer tou pour asire ki bann zanfan zot grandi e epanouir antoure avek lanmour, swen, lafeksyon e ki zot devlope fizikman, entelektyelman e mantalman, me 25-an plitar o milye tou sa devlopman i osi annan bann renar ki apel labi zanfan ki pe menas lavenir nou zanfan e konman paran proteksyon nou zanfan i komans avek nou e fini avek nou. Ki nou pou fer pour protez nou zanfan plis? ‘Paran zot devret ekout nou plis e pas plis letan avek nou’ bann zanfan in dir mwan,» Minis Meriton ti dir bann ki prezan.
Dokter Erna Athanasius, ki Anbasadris pour bann size zanfan ek madanm, ti osi adres tou bann partisipan dan sa lamars an dizan ki «nou bezwen envestir plis zefor e plis lanmour pour donn sipor ek proteksyon nou zanfan. Fodre nou okip e vey zot drwa akoz zot pli vilnerab.»
Dokter Athanasius ti azoute ki «nou’n rasanble pour nou mars kont tout sort labi zanfan e fodre nou senm sa mesaz dan tou kwen avek bann ki ankor krwar ki zanfan napa drwa e ki zot pa merit annan drwa parey lezot et imen. Labi zanfan napa lekskiz , zanmen,» i ti ensiste.
Apre sa Minis Meriton, Kimberline Camille, reprezantan bann zanfan, ti premye pour larg bann balon roz ek ble konman en zes senbolik an siny lespwar pour nou bann zanfan.
Sa ti swiv par plizyer lezot balon large par plizyer dimoun dan lafoul.
Parmi bann ki ti’n ralye pour pran par dan sa lamars ti enkli zanfan sorti dan plizyer lekol, bann group travayer sorti dan diferan lorganizasyon ek lenstitisyon e plizyer o personalite parey o komiser Britanik Lindsay Skoll, sekreter prensipal pour Zafer Sosyal Linda William Melanie, plizyer group sorti dan diferan legliz e lezot denominasyon relizyez ensi ki plizyer paran.
Rosalette Dodin, en travayer Zafer Sosyal, ti dir o komansman sa lamars ki si sa group dimoun in ralye pour marse se ki nou anvi vwar en sosyete kot nou zanfan zot viv zot linosans, kot personn pa abrez zot lavenir e kot demen zot pa tonb dan bann difikilte sosyal akoz bann sikatris labi.
Ti avek bokou lanmizik, pankar ek bannyer ki lamars ti deroule.
Lamars an progre
