Parabol kannet |21 November 2014

Alors en zour ti annan en ron kannet avek trant kannet ladan. Tou bann kannet ti byen avek kanmarad e zot ti fer tou keksoz ansanm dan larmoni e lape. Zot ti manz ansanm, zot ti zwe ansanm, travay ansanm, dormi ansanm. Tou ti pas byen dan ron e zot ti ere.

En zour enn parmi bann kannet ti ganny en nouvo lide.  «Si konmela mon ti fer en keksoz diferan dan nou kominote kannet ki ti pou arive?»  E alors i ti deside zwe malis lo enn son kanmarad kannet. Sa swar la, ler tou kannet ti pe ronfle avek sonmey, li i ti leve. San fer okenn tapaz, dousman e avek bokou prekosyon, konmsi en lyon ki pe konsantre pour fer lasas zibye, i ti al kot en kanmarad kannet.

Sa kanmarad kannet ti pe dormi telman profon sonmey, dan en rev sitan zoli e gou, i pa ti antann nanryen ditou. Alor nou zwer kannet ti kas en pti bout avek sa enn ki pe dormi profondeman.

Lannmen bomaten ler zot tou zot ti leve, sa enn kannet ki ti’n ganny andomaze ti komans plennyen ayoyo an so-d-larm. Personn pa ti konpran ki ti’n arive e zot tou zot ti get kanmarad e zot ti per. Sa kannet ki ti koupab li i ti reste trankil e gard son sekre.

Depi sa zour tou keksoz ti sanze dan sa kominote kannet. Keksoz ti nepli parey avan. Zot ti nepli manz ansanm, zwe e travay ansanm e dormi ansanm dan larmoni e lape. Zafer ti’n sal e tou keksoz ti’n devir anba lao. Ti annan mister e mefyans parske larmoni ek lape ti’n ganny deranze e laverite pa ti sorti. Malez e maler ti’n fini antre dan kominote kannet e dezorme tou dimoun ti malere.

Moral: En pti aksyon move, malisye e malonnet i kapab konmans en sikl danzere ki andomaz en kominote annantye e fer ditor. En kominote ki senm dibyen i rekolte dibyen. Parkont en kominote ki senm dimal i rekolte dimal.  Tou i komans par sak endividi ki konstri ou detri son kominote. Lekel ki ou ou deside pour vini?

Kontribye par Robert Ahweng (Care House)