Prezidan René i selebre 79-an |15 November 2014

‘Nou bezwen fer sir ki nou reste toultan devan e vivan’

Ansyen Prezidan France Albert René ki ti ne le 16 Novanm 1935, pou donk fet son 79enm lanniverser demen.

I en tradisyon kot Prezidan René i fet sa lokazyon avek bann lezot dimoun aze. Sa lannen pa’n en leksepsyon kot Prezidan aktyel Msye James Michel in ofer Msye Rene ek son bann envite en resepsyon.

Sa parti lanniverser ti fer Vandredi apremidi dan zarden State House. Osi prezan ti Vis-Prezidan Danny Faure, bann minis, manm Lasanble Nasyonal, manm komite santral Parti Lepep ek lezot envite.

Se Prezidan Michel ki ti akey son predeseser ek son fanmir a zot larive State House. I ti swet li bon anniverser, ansanm avek tou bann dimoun aze ki ti ganny zot lanniverser yer.

Dan en pti ladres, Prezidan Michel ti dir ki petet nou a dir ki i dir mersi tro souvan, me akoz gratitid napa limit i pou dir mersi Prezidan Rene e tou dimoun aze ki’n travay pour anmenn Seychelles kot i ete ozordi. I ti remersye li pour son vizyon ek sazes. I ti donn lasirans ki i pou toultan rekonnesan pour sa.

«Ou aksyon brav avek ou bann kanmarad sa lepok in sanz vizaz Seychelles e ozordi nou annan en pei ki ganny rekonnet dan lemonn antye,» i ti dir.

I ti azoute ki nou devret annan rekonnesans pour bann ki’n kre pour nou en meyer lavi.

«Rekonnesans i ganny son sours dan lanmour e se lanmour ki fer nou kontinyen travay,» i ti dir.

Prezidan Michel ti lans en lapel a bann zenn pour ki zot pran plis swen avek zot paran e pa rezet zot.

«Bann zenn i parfwa annan tandans bliy serten valer e enn sa bann valer se rekonnesans a nou vye paran ki’n fer nou grandi. Mon lans en lapel a bann ki pli zenn pour pa rezet zot bann vye paran, pour ki zot osi letan zot in vye zot bann zanfan a okip zot. Sa a ogmant linite antre nou pour fer nou kontinyen travay ansanm pour byennet nou pei,» Prezidan ti dir.

Prezidan Rene ti reponn an fezan rapel ki mannyer Sesel ti ete 50-an pase ler i ti form SPUP (Parti Ini Lepep Seselwa), avek bi pour anmenn en meyer lavi pour Seselwa.

«50-an pase Sesel ti dan en koud pwen. Ti en moman grav e difisil pour bann pov, bann vye e bann ki annan kek dezabilite. Mon ti kre SPUP pour sanz lavi nou pep. Nou’n travay pandan 50-an pour nou kre en sosyete pli egal kot sa ki pli vilnerab i annan mwens problenm. E nou’n fer li. Ozordi Sesel i klase premye dan Lafrik pour son kalite lavi. E nou pe kontinyen fer progre. Nou bezwen lager pour nou kontinyen gard nou linite,» i ti dir.

Prezidan René ti konklir an dizan ki nou bezwen asire ki nou reste devan e vivan.

«Annou pa oubliye ki en pei i ganny zize par lafason ki i tret son bann vye, son bann dezabilite, son bann madanm. Nou bezwen fer sir ki nou reste toultan devan e vivan,» ti bann parol saz sorti kot Prezidan René.

Dan en lanbyans bal tradisyonnel, bann envite ti anmize avek santer Mervin Camille, Aaron Jean e Antoinette Dodin e group ‘Fame’ ziska tar apremidi.

Konmsi tou dimoun ti’n antann parol Prezidan Michel ler zot ti sant avek Mervin sanson David Philoe, ‘Si demen i ale’.

«Annou kiltiv lanmour ler soley i leve, nou a partaz li ansanm ler soley i kouse,» refren sa sanson ti dir.

Ti osi lokazyon pour le de dwayen nou pei, Msye Bertie Mahoune e Madanm Nancy Marie, resevwar en trofe avek Minis pour Zafer Sosyal, Devlopman Kominoter ek Spor Msye Vincent Meriton.

Zournal ‘Nasyon’ i profit lokazyon pour swet bonnaniverser Prezidan René.