Seychelles Musicians’ ‘Wall of Fame’ - Plis artis i ekspekte ganny onore |30 October 2014

Dezorme artis pou kapab war zot non azoute lo Seychelles Musicians’ ‘Wall of Fame’ a nenport ki moman, sirtou pandan bann levennman parey Karnaval e Fête de la Francophonie.

Se Minis pour Tourizm ek Kiltir Alain St Ange ki ti dir sa Mardi letan i ti devwal non 4 artis ki zot non in ganny enskrir lo sa ‘Wall of Fame’.

Sa 4 nouvo artis i David Andre, Jean-Marc Volcy, Patrick Victor, Jany De Letourdie e zot zwenn de lezot artis – David Philoe ek Francois Havelock – ki zot non ti deza lo sa moniman.

Me fodre note ki selman David Andre parmi sa 4 artis ki ti prezan kot sa seremoni Mardi. Lezot pa ti kapab asiste akoz swa zot pa dan pei oubyen pour lezot rezon.

Sa seremoni pour onor sa 4 nouvo artis ti deroul kot Bibliotek Nasyonal kot sa ‘Wall of Fame’ in ganny plase.

Parmi bann envite prezan ti Minis Peter Sinon, Anbasader Calixte d’Offay, manm lasanble nasyonal, sekreter prensipal pour kiltir Benjamine Rose, bann manm komite lorganizasyon Festival Kreol e plizyer lezot ankor ki ti’n zwenn lezot artis pour siport ladmisyon zot bann koleg lo lalis bann pli gran vedet lanmizik ek sanson Seselwa.

Dan en pti diskour, Minis St Ange ti dir ki i espere ki ofil bann lannen nou a vwar lezot artis lo sa miray.
I ti azoute ki dezorme artis pou kapab war zot portre azoute lo sa miray a nenport ki moman, sirtou pandan bann levennman parey Karnaval e Fête de la Francophonie.

« I enportan pour rekonnet artis ki pa’n gard son talan pour li tousel me ki’n partaz li lo nivo lokal e anmenn non Sesel lo nivo enternasyonal, » Minis St Ange ti dir.

Tyermenn SeyMas (sa lasosiasyon ki reprezant bann mizisyen ek santer Seselwa), Ralph Amesbury, ti lo son kote remersye minister kiltir pour rekonnet fason ki bann artis in port non Sesel aletranze.

I ti azoute ki artis i ganny rekonnet akoz lar i sanz panse dimoun.

I ti anonse ki bann artis pa pou ganny rekonnet dapre zot laz ou si zot mor ou vivan, me dapre sa ki zot in fer.

Se SeyMas ki propoz artis pour sa ‘Wall of Fame’. Sa lasosiasyon in remersye minister kiltir pour ekout zot e tir zot portre lo pave larantre Bibliotek Nasyonal e plito met zot lo miray sa batiman.

Pandan seremoni Mardi, SeyMas ti osi lans son sit enternet ki apel ‘Kreol Wave’.