Minis St Ange i eksprim regre swivan rapor ki Bibliotek in zet liv |30 October 2014

Swivan rimer e menm rapor dan serten medya ki Bibliotek Nasyonal ti pe zet ou byen menm bril liv lo konblaz Providence, Minis pour Tourizm ek Kiltir Alain St Ange in eksplike ki sa ki’n arive i aksyon endividyel de manm staf Bibliotek Nasyonal ki pa’n respekte bann prosedir.

Minis St Ange ti fer sa deklarasyon pandan en rankont avek lapres kot son biro dan batiman Espace pli boner sa semenn.

Menm si i en vye tradisyon kot Bibliotek Nasyonal i donn piblik bann liv ki in tire lo letazer, minis ti eksplike ki sa i ganny fer dapre en prosedir byen etabli.

Normalman, lalis sa bann liv i ganny anvoye kot sekreter prensipal pour kiltir ki aprouve ki zot ganny met a dispozisyon piblik e en rikord apropriye i ganny mentenir.

Me dan ka sa dernyen lensidan, sa de travayer Bibliotek an kestyon pa’n non selman swiv prosedir normal, me zot in osi pran linisyativ pour zet en serten kantite liv lo konblaz.

Minis St Ange in sepandan demanti ki liv, an kontan liv relizye e politik, in ganny brile.

Msye St Ange in osi devwale ki se serten travayer Bibliotek menm ki ti enform li lo sa sitiasyon e ki an konsekans bokou liv ki ti’n zete in ganny rekipere.
In felisit sa bann travayer pour zot responsabilite profesyonnel e in promet pour pran aksyon disipliner avek sa ki responsab.

«I avek bokou latristes ki ozordi mon anonse ki Bibliotek Nasyonal in komet en anomali ki i pa ti’n devret komet. I enportan pour fer en deklarasyon apre ki nou staf in anmenn en konsern ki ti pe afekte nou minister. Staf in reazir dan en fason efikas e apre en lanket ki nou’n fer, minister in deside pour pran son responsabilite pour remedye sitiasyon e disiplin staf,» Msye St Ange ti dir.

Minis responsab pour kiltir in osi anonse ki son minister pou pran tou mezir neseser pour asire ki sa pa ariv ankor.

«Dezorme nou pou deside koman pour retir bann propriyete minister. E sa pou aplik non selman pour Bibliotek me pour tou seksyon dan minister. Personn pa pou kapab retir okenn keksoz san direktiv sekreter prensipal. Dan ka liv, nou pa devret zete me plito donn dan en fason pli onnet e profesyonnel kot rikord i ganny garde. Nou kapab donn lekol, bann fwaye ou menm tret bann liv ki’n ganny abimen,” minis ti ensiste.

Deklarasyon Minis St Ange a sirman byen ganny akeir par bann ki kontan liv e kontan lir e ki ti’n soke par sa nouvel zet ou bril liv.
Apretou, en liv i pa zis porter en savwar, me i tout en kiltir dan limenm ki nou pa zanmen devret detrir !