Kassav i promet en spektak ki pou fer lafoul bouze |25 October 2014

“Nou pou zwe bann sanson ki dimoun i kontan  e ki pou fer piblik Seselwa bouze e bouz plis ankor,” Jocelyne Béroard, enn bann manm group Kassav ki pli popiler, ti dir yer.

I ti azoute ki dan sa spektak 2erdtan ki group Kassav pe fer tanto lo Stad Popiler  zot pou zwe maksimonm sanson pour piblik Seselwa pour fer zot kontan e bouze menm.

Yer dan en rankont avek lapres lokal ek etranze sa de manm group ki pli popiler isi -- Jocelyne Béroard ek Jacob Desvarieux -- ti eksprim zot lazwa pour ankor en fwa retourn Sesel pour en spektak apre zot premye konser isi an 1991.

Sa rankont, ki ti deroul kot biro MinisterTourizm dan batiman Espace, ti osi asiste par Minis pour Tourizm ek Kiltir Alain St Ange, sekreter prensipal pour kiltir Benjamine Rose, serten manm en delegasyon Renyonnen ki osi isi pour partisip dan sa 29enm Festival Kreol, osi byen ki bann lezot manm organizater spektak Kassav isi tanto.

Jocelyne ti dir zot espere atraver zot lanmizik sedwir piblik Seselwa  parey zot ti fer 23-an pase.

Pour bann zenn ki ozordi zot ekout bann sanson e apresye lanmizik zouk ki group Kassav i prodwir, ki antann zot paran ek lezot dimoun pli aze koz bokou lo sa group ek spektak ki zot ti fer isi plis ki 20-an pase me ki pa ti ankor ne sa letan, Jocelyne i asir zot ki bann manm son group zot ankor annan bokou lenerzi pour fer zot tou bouze e vibre tanto.

“Nou ti tous bann zenn avek nou lanmizik ler nou ti fer nou premye spektak isi e mon kwar ki an 2014 nou pou tous ankor bann zenn,” Jocelyne ti dir.

Lo son kote Jacob i dir ki zot premye konser isi ti enn ki ti byen pase kot lafoul ti vreman so menm e zot ekspekte ki sa enn tanto pou osi so menm.

Jocelyne ti asir piblik Seselwa ki bann sanson dan repertwar Kassav tanto i bann ki zot konnen sof kekfwa pour enn ou de ki pa tro koni parmi piblik Seselwa.
Sa group ki’n ansanm pour 35-an i dir ki pli gran sekre deryer linite antre son bann manm i ki sak manm in travay dan lentere e byennet sa group.

Jocelyne ti dir ki depi o komansman sak manm in siport e apir kanmarad e zot bann sikse in dan lentere group.