Pointe Larue segonder gran venker final kwiz kreol enterskoler |25 October 2014

Lekol Pointe Larue segonder i gran venker final kwiz kreol enterskoler 2014.
Final sa konpetisyon ti fer yer kot Teat Nasyonal, Mont Fleuri.

Dan sa final, lekol Pointe Larue ti pe fer fas avek lekol Anse Royale segonder.

Final kwiz kreol ant bann lekol i enn sa bann aktivite anyel ki ganny organize pour koensid avek Festival Kreol ki sa lannen pe mark son 29enm lanniverser.

Sa final ti konpri trwa group 16 kestyon baze lo lalang ek literatir kreol, zedmo, proverb, ekspresyon kreol, krwayans, kiltir, listwar avek konesans zeneral.

Premye ek dezyenm seri kestyon ti bann kestyon endividyel tandis ki trwazyenm seri ti bann kestyon lekip.

Ti osi annan bann prozeksyon zimaz kot partisipan ti bezwen idantifye sa ki ti pe ganny prozekte. Sak etidyan ti annan 40 segonn pour reponn kestyon kot de pwen ti ganny donnen pour larepopns korek e en pwen si kestyon i pas kot en lot group.

Lekol Pointe Larue ti ganny seri kestyon enn ek trwa e Anse Royale ti ganny dezyenm seri kestyon.
Se Lotorite Laviasyon Civil Sesel (SCAA) ki ti sponsor bann pri pour sa final.