Foronm lo rol foklor ek lanmizik dan valorizasyon e prezervasyon kiltir |25 October 2014

Pour komemor Lazournen Enternasyonal Kreol, le 28 Oktob, 2014 Lenstiti Kreol an kolaborasyon avek Liniversite Sesel ek SeyMas (lasosiasyon mizisyen) pe organiz en foronm lo rol foklor ek lanmizik dan valorizasyon e prezervasyon kiltir.

Sa foronm pou santre lo tinge, son lorizin, lanmizik, parol sanson ek ladans koman enn bann leritaz entanzib dan foklor Sesel akoz i en laform ladans ki pe disparet.

Lobzektif foronm se pour diskit lo nivo prezantasyon diferan laspe nou foklor, pli spesifikman tinge; diskit plas tinge koman en ladans lo lasenn rezyonnal e enternasyonal ; diskit lavenir tinge dan Sesel ; sansibiliz piblik e ankouraz artis vizavi lenportans lanmizik foklorik dan Sesel, son devlopman ek evolisyon.

Foronm pou deroul depi 9er bomaten ziska 3er apremidi kot Lenstiti Kreol.