Follow us on:

Facebook Twitter LinkedIn YouTube

Archive -Seychelles

Zournalis i koz lo kreol dan medya |24 October 2014

En group zournalis ti zwenn kot sant konferans Lungos Merkredi pour diskit lo litilizasyon kreol dan medya.

Sa foronm, ki ti ganny organize par lasosiasyon pour bann ki pratik medya Sesel (Amps), ti dirize par en veteran dan medya, Pat Matyot, dan prezans tyermenn Komisyon Medya Ibrahim Afif, reprezantan lasosiasyon bann ekriven lardwaz, e reprezantan lenstiti ek komite kreol.

Msye Matyot, ki en gran defanser langaz kreol, ti partaz son pwendvi personnel an dizan ki «kreol pe sanze, i pe sibir presyon angle, me … pour bokou Seselwa kreol i ankor lalang ki domin en gran parti zot panse ek zot lemosyon».

I ti partaz son lopinyon lo akoz bokou lapres ekri i minimiz lartik an kreol. «Ziska ler bann ki responsab i vin devan e eksplike pour ki rezon zot pa tro ekri lartik an kreol, mon kwar ki bokou i mazin kote komersyal e se pour sa rezon ki zot ekrir plis an angle.»

Plizyer partisipan ti fer resorti ki bokou lanfaz i ganny mete lo angle ek franse, par egzanp si i annan en fot ortograf dan angle ek franse bokou manm piblik pou fer konplent, par kont byen rar ou pou vwar ki manm piblik ou lekter i konplent ler i annan fot ortograf dan en lartik an kreol.

Parmi bann lezot fakter ki ti ganny fer resorti dan sa foronm lo akoz i annan presyon lo langaz kreol i devlopman kiltirel, kot bann nouvo lide i antre, bann nouvo lobze i ranplas sa ki vye e sa i fer ki lalang kreol i perdi serten mo e serten mo angle i ganny kreolize.

Konman parti manda Amps pour organiz bann kozri ek foronm lo bann size ki afekte medya dan zot travay toulezour, en lot foronm pou ganny organize le 25 Novanm kot bann profesyonnel dan medya pou koz lo HIV/Sida.

 

 

 

» Back to Archive