Festival Kreol 2014 i demare ankor dan 4 zour |21 October 2014

Festival Kreol 2014 i demare Vandredi le 24 Oktob e yer Minis pour Tourism ek Kiltir Alain St Ange ti zwenn avek lapres pour donn detay sa pli gran manifestasyon kiltirel ki Sesel i organize tou le lannen.

Minis St Ange ti fer resorti ki sa enn festival i en moman kle pour premyerman prepar larive 30enm Festival Kreol lannen prosenn kot Sesel pou bezwen fer li vin vreman en pwen istorik akoz se nou pei ki annan sa pozisyon avangard dan met lalang kreol de lavan.

Se pour sa rezon ki sa lannen, komite organizater, departman kiltir, Konsey Nasyonal pour Lar (Nac), Bord Tourizm Sesel (STB), tou ansanm in met en zefor spesyal pour asire ki sa enn festival i fer son mark e i vin sa ‘stepping stone’ pou lannen prosenn.

Minis St Ange ti pe koz dan prezans sekreter prensipal pou kiltir Benjamine Rose, sef egzekitif Nac Jimmy Savy e manm komite organizater.

Minis St Ange ti nonm enn de aktivite markan pandan sa festival tel ki louvertir en galeri nasyonal kot pou annan en display tou bann koleksyon nasyonal par bann artis lokal, en Wall of Fame kot 4 artis pou ganny onore e lefe ki lavil Victoria pou transform an en gran galeri kot lapentir Seselwa lo bann gran pano pou ganny ekspoze.

“Nou ti bezwen redonn Festival Kreol son plas lo kalandriye aktivite nou pei, nou ti bezwen remet li azour avek devlopman ki’n pran plas e asire ki Festival Kreol i reste sa festival kot Sesel e Seselwa i selebre son lidantite. Mon lapel se ki tou Seselwa i zwenn avek komite Festival Kreol dan sa festival 2014 e montre nou kreolite, nou latasman ek kreolite e montre ki nou fyer sa lidantite,” Minis St Ange ti dir.

Minis ti dir ki progranm sa lannen i entans e en keksoz ki zot in met lanfaz lo sa se ki i bezwen annan aktivite pour gran piblik Seselwa pour asire ki Seselwa i kapab partisip dan sa selebrasyon a tou nivo.

I ti dir ki moman kle i sware louvertir Vandredi swar dan en spektak ki pou vreman tous tou Seselwa dan son lanpler e son kreolite. E en lot fason pour fer nou festival antre dan tou son lanpler, i ti dir, se louvertir nou ‘National Arts Gallery’ dan batiman Minister Tourizm ek Kiltir.

“Sa i en pwen markan kot Sesel i rekonnet e i donn en valer azoute sa ‘creative art’ bann artis ki kre keksoz, pour war zot plas finalman dan nou pei. Me anplis ki sa nou pou met ‘on display’ apre sitan lannen, sa koleksyon nasyonal ki annan dan nou pei. Seselwa e viziter i a kapab mars dan galeri e regard sa koleksyon,” Minis ti dir an azoutan ki sa pa ti pou arive san sipor Prezidan Larepiblik Msye James Michel.

“Dan lavil nou pe fer Victoria vin koman en gran galeri osi. Nou pou pran en seri bann lapentir lokal par bann pent Seselwa e nou pou display zot dan Victoria lo bann gran pano, en fason ki ler ou mars dan Victoria ou a krwar ou dan en ‘art gallery’,” Minis St Ange ti osi dir.

En lot moman for sa festival se ‘Wall of Fame’ kot lannen pase non de artis renonmen ti ganny marke lola -- defen Francois Havelock e David Philoe.

“Se pa minister, Nac ou sekreter prensipal ki deside ki artis ki nou onore. Nou fer li dan fason tre demokratik, nou travay avek lasosiasyon ki reprezant bann artis. Sa lannen nou pou mark kat dimoun e sa kat dimoun in ganny propoze par Lasosiasyon Mizisyen Sesel (SeyMas). Tou le kat artis a kapab vini kot zot a ganny zot rekognisyon neseser,” minis ti dir. Pou annan en lot ‘Wall of Fame’ dan Minister Tourizm ek Kiltir pour bann artis ki’n mor, minis ti fer resorti.

Konsernan Bal Asosye, minis ti dir ki sa levennman pou sa lannen fer kot Reef Hotel akoz sa landrwa labitid (Lenstiti Kreol) pa pe kapab tenir presyon sa kantitte dimoun.

En lot sanzman konsernan sa bal se ki i annan en fason abiye standar pour tou dimoun. Bann madanm i met rob long ou zip long e bann msye semiz lanmans long ek kannson long. Me minis ti osi fer resorti ki komite pe rod en landrwa permanan pour Bal Asosye.

I ti osi anonse ki tou dilon lannen pou anann bann aktivite kreol ziska ver Oktob  ler “kreolite i fleri”.

I ti lans en lapel avek tou biznes dan Victoria pour dekor zot landrwa pour montre ki zot fyer zot Seselwa, zot fyer zot kreolite.

PS Rose ti apre pas lo progranm Festival Kreol 2014 an detay kot apard bann aktivite labitid pou annan nouvote tel ki foronm lo lanmizik tradisyonnel kreol dan Losean Endyen; kwiz enter-distrik; tournwa zwe domino dan karpark Stad Popiler; Hype Beach Party Borlanmer Au Cap; foronm lo promosyon larsitektir tradisyonnel kreol, pour nonm detrwa.

Festival Kreol sa lannen pou deroul ziska Vandredi le 31 Oktob.