Bann ansyen zenn parlmanter i lans zot lasosiasyon |01 September 2014

Bann ansyen zenn parlmanter ki’n dan lepase reprezant zot distrik oubyen lorganizasyon dan Lasanble Nasyonal Lazenes, in form zot prop lasosiasyon.

Lasosiasyon Ansyen Zenn Parlmanter Sesel ti ofyelman lanse Vandredi apremidi dan en pti seremoni kot Sant Konferans Enternasyonal (ICCS). Sa aktivite ti tonm dan kad Festival Lazenes ki ti deroule pandan wikenn.

Se Msye Roy Banane, en zofisye lapolis, ki’n ganny elekte koman premye tyermenn sa lasosiasyon. M. Banane i en ansyen spiker Lasanble Nasyonal Lazenes e reprezantan pour distrik Bel Ombre.

In dir ki bi sa lasosiasyon se pour donn bann ansyen zenn parlmanter lokazyon pour kontinyelman vin ansanm e kontinyen donn en koudmen dan lasosyete.
“Nou annan bokou pour ofer e kontribye atraver nou leksperyans. Nou bezwen ede pour trouv en solisyon pour ban problenm ki egziste e batir nouvo zenerasyon,” i ti fer resorti.

Msye Banane in azoute ki atraver son progranm, lasosiasyon i anvizaze tous tou sekter lazenes. I ti profite pour prezant en kopi zot plandaksyon avek sef egzekitif Konsey Nasyonal Lazenes Madanm Vicky Van Der Westhuizen.

Lezot manm komite egzekitif Lasosiasyon Zenn Parlmanter Sesel i: Nathanielle Chrispin (vis-tyermenn), Nathalie Brutus (sekreter), Anael Bodwell (trezorye).

Lezot manm komite i Hansel Vidot, Maizline Esther, Beguitta Melanie, Anil Bacco ek Catherine Didon. Zot in ganny elekte lo en manda 2-an.

Lasanble Nasyonal Lazenes, ki en progranm Konsey Nasyonal Lazenes, pe sa lannen selebre son dizyenm lanniverser.

En total 380 zenn in ziska prezan pas atraver sa parlman.

Seremoni Vandredi ti osi deroul dan prezans sekreter prensipal pour Lazenes Msye Alain Volcère, lezot ansyen zenn parlmanter ek bann manm Lasanble Nasyonal Lazenes aktyel.