Gospel Show, en dimansyon relizye dan Festival Lazenes |01 September 2014

En Gospel Show oubyen spektak gospel ki ti fer dan Sant Konferans Enternasyonal (ICCS) Sanmdi apremidi in donn en dimansyon relizye a sa festival lazenes anyel ki ti fer pandan wikenn.

Depite sef egzekitif Konsey Nasyonal Lazenes Msye Alvin Laurence, ti menm dekri sa spektak konman «aktivite pli enportan dan Festival Lazenes» letan i ti adres sa pti lafoul zenn, envite e lezot manm piblik ki ti’n pran plas dan lasal.

«Annou pa enkyet lo kantite, grander ek piblisite. Se fason pour nou dir mersi an santan pour Bondye, sa enn ki pli gran», i ti dir.

Reveran Anglikann Christine Benoit ti beni bann spektater ek artis ki ti konpri Veronique Barra, Tisha Pointe, Andy Wirtz, Mario Bouzin, Ziggy Adam e osi Lakoral Minister Lasante, Kids for Christ e lezot group relizye.

Reveran Benoit ti fer referans a Premye Let Sen Paul a Timothé, Verse 12 Sapik 4 ki ti’n enspir sa spektak.

«Pa les personn mepriz ou akoz ou zenn, me kre en legzanp pour bann krwayan dan diskour, dan lavi, dan lanmour, dan lafwa e dan pirte», sa Sapit i lir.

Mesaz ki  Reveran Benoit ti transmet a bann zenn se ki laz pa zis en sif, me i osi en leker.

«Nou tou nou en voyaz e avek Senyer nou kapab fer en gran mervey. Pa nou laparans ki enportan, me sa ki nou dir e sa ki nou fer. Les sa lanmour pour Bondye dan nou leker reflekte par en sourir lo nou figir,» i ti dir zot.

Kantite, grander ek piblisite ti finalman vin segonder kan tou dimoun ti non selman apresye en zoli konser gospel, me kre en lanbyans spirityel ekstraordiner an santan e dansan.

Portre ki akonpanny lartik i montre serten performans pandan spektak.