Madanm Eva Bethew i selebre son 100enm lanniverser |01 August 2014

Bokou dimoun i swete viv ziska 100-an ou plis, me napa bokou ki arive vwar sa laz.

Dan Sesel, i annan plis santener madanm ki zonm. Aktyelman, i annan zis en msye ki annan 100-an, konpare avek 9 madanm ki annan 100-an ou plis dan Sesel. E sa sif ti ogmante yer le 31 Zilyet 2014 ler Madanm Eva Bethew ti selebre son 100enm lanniverser, ki fer i vin 10enm madanm dan Sesel ki ganny 100-an ou plis e ankor vivan.

I ti selebre son lanniverser kot i reste St Louis dan prezans konseye spesyal dan departman kominoter Dan Frichot, manm Lasanble Nasyonal pour distrik St Louis Herbert Houareau, ladministrater sa distrik Rachel Joseph, serten zofisye dan gouvernman, bann manm fanmiy ek zanmi.

Sa lokazyon spesyal ti konmans avek en lanmes ki ti ganny prezide par Per Guy. I ti swete ki Madanm Bethew ava kontinyen reste for dan son lafwa.
Answit, Onorab Houareau ti prezant Madanm Bethew avek en kado lo lapar Prezidan Larepiblik. Myse James Michel. Dan mesaz ki i ti’n anvoye, Prezidan Michel ti swet Madanm Bethew en zwaye lanniverser e felisit li pour arive war sa laz e ti demann li pour aksepte sa kado ki i ti’n anvoye.
Madanm Bethew ti ne le 31 Zilyet 1914. Tou son bann ser ek frer in mor.  

In reste dan distrik Cascade, Mont Buxton e answit St Louis ziska ozordi.
I annan 13-an depi ki son msye in mor, me malgre sa Madanm Bethew in touzour kontiny son lavi.
I annan 2 fiy, 3 garson, 15 pti zanfan e plizyer aryer pti zanfan.

Son premye zanfan, ki ti en garson, in mor enpe letan pase.
Vi ki Madanm Bethew pa ti tro kapab koze pour rezon lasante, son bann zanfan in dir ki zot byen kontan pour war zot manman ariv sa laz, e ki zot menm pa kwar si zot pou ariv parey li.

Zot in fer remarke ki i ti en dimoun ki kontan travay e ki kontan fer bokou lapriyer, e alor se son krwayans for dan Bondye ki’n fer li ariv 100-an.

Pour sa lokazyon bann zanfan Madanm Bethew ti pran sa loportinite pour remersye Prezidan James Michel pour son zenerozite pour mazin zot manman pour sa lokazyon e osi lezot dimoun ki’n ed zot dan en fason ou en lot.

Zot ti osi swete war zot manman viv ankor plis letan avek zot si Bondye i permet.
Madanm Bethew i vin dezyenm dimoun dan distrik St Louis ki’n arive selebre 100-an sa lannen.

Ladministrater distrik in fer resorti ki avek lagras Bondye, an Out sa lannen i ava annan ankor en madanm dan menm distrik ki ava selebre son 100enm lanniverser.