Zabitan Cascade i eksprim konsern lo en proze konblaz |31 July 2014

Zabitan Cascade ek lezot dimoun ki konsernen avek devlopman Providence, in ganny lokazyon pour donn zot lopinyon lo en nouvo proze konblaz lo sa morso lakot ki tonm dan sa distrik.

Sa ti dan en miting piblik dan kad Letid Lenpakt Lanvironnman (EIA) ki ti deroul dan sant kominoter Cascade Mardi apremidi.
Diskisyon, ki ti byen animen lo sa propozisyon pour konble ankor 3.5 ektar later, ti deroul dan prezans Minis pour Lanvironnman Rolph Payet, son sekreter prensipal Wills Agricole, manm Lasanble ek ladministrater distrik Cascade Charles Decomarmond e Fred Barrack respektivman, ensi ki reprezantan Minister Litilizasyon Later ek Labita.

Lezot partisipan ti enkli reprezantan Lasanm Komers, bann akter dan lendistri tourism, biznes, konstriksyon, parmi lezot.

Sa nouvo proze i en linisyativ Eden Island Development Company ki pe demann gouvernman permisyon pour fer sa devlopman.
Si i ganny laprouvasyon Lotorite Plan, sa nouvo morso later i sipoze vin trwazyenm faz gran proze konblaz Providence.  

Kontrerman a premye ek dezyenm faz, i pa pou fer par kirmol. Sa porsyon lanmer pou plito ganny ranpli par later transporte par bann gro kanmyon e i pou ganny proteze par en miray ros.

Dan sa nouvo morso konblaz, 2.5 ektar pou sipoze servi par Eden Island Development Company ki’n osi soumet en demann avek Lotorite Plan pour stokaz lekipman e kanpman pour travayer.

Vi ki Eden Island pa pe peye pour sa devlopman, i pe ofer gouvernman sa lot ektar.
Dan en fason zeneral, zabitan Cascade ek lezot dimoun ki ti prezan ti eksprim zot dezakor anver sa proze.

Zot ti santi ki zot deza pe ganny afekte par morso konblaz kot i zet salte e ki sa nouvo devlopman i riske poz problenm desarz e menm evantyelman enfekte delo. Sa i akoz stasyon distribisyon delo i sitye obor stasyon desarz.

Zot ti osi demande si i’n annan en prosedir ‘tender’ pour realizasyon sa proze, ouswa si zot senpleman devan en sityasyon ki desizyon in fini ganny pran lola.

Zot ti egalman enterese pour konnen ki pou arive avek bann fasilite kan proze Eden Island i konplete byento.

Dan sa konteks, zot ti demande ki bann antreprener Seselwa i osi kapab ganny loportinite pour ganny akse avek en bout sa later konble, ou ki zot kabab ganny permisyon pour fer zot prop konblaz.

Vi ki i deza annan en kanpman pour travayer etranze dan sa rezyon e ki zόn konble Providence pa sipoze en zόn rezidansyel me plito enn endistriel, zot ti propoze ki bann travayer Endyen i al reste lo en lot propriete ki ganny spesifikman demarke pour zot.

Bann zabitan ti eksprim zot fristrasyon akoz konsiltan lo sa proze pa ti kapab donn larepons a laplipar kestyon ki zot ti demande. Zot ti osi deplor labsans bann promoter e serten lotorite konsernen dan miting.

An konsekans, zot ti propoze ki en komite i ganny formen pour diskit lo sa size e ki en dezyenm miting i ganny organize apre plis konsiltasyon.
Apard reprezantan distrik Cascade, sa komite pou osi konpri manm sorti Minister Litilizasyon Later ek Labita, Minister Lanvironnman, Minister Lasante ek Lotorite Plan.

« Nou pa dakor e nou pa kapab reste trankil, akoz sa proze i telman enzis, » en antreprener ti senpleman dir.
Lo son kote, manm Lasanble Nasyonal pour Cascade, Onorab Charles Decommarmond, ti dir ki sa bann konsern i valab e ki son distrik pou bezwen pran posesyon ou ‘ownership’ sa sitiasyon.
 
I ti azoute ki si i neseser pou konble pour fer devlopman, nou bezwen fer li byen an prenan kont lanvironnman ek bann dimoun ki kapab ganny afekte.
Dan sa laliny, i ti dir ki lotorite distrik Cascade pou diskit avek gouvernman lo fezabilite sa konblaz e pou demande ki bann antreprener lokal i osi benefisye.

I ti azoute ki i devret annan en kontra ant gouvernman ek Eden Island, avek posibilite agrandisman sa nouvo porsyon konblaz pour ki gouvernman i kapab ganny en pli gro bout.

I ti ensiste ki fodre osi konn kondisyon gouvernman avek devloper e si gouvernman pou vreman benefisye.

Reprezantan Cascade dan Lasanble Nasyonal ti azoute ki sa devloper i bezwen osi envestir dan devlopman sa distrik, enkli fer en bout konblaz pour son bann pti antreprener e deblok bann lapas kan zot bouse ek disab.

« Nou bezwen arete avek sa mantalite kot distrik pa ganny konsilte. Se pour sela ki i annan plis kestyon ki larepons parey nou’n war ozordi, akoz a en serten moman ou pa konnen lekel ki responsab pour sitiasyon ki devlope. Nou bezwen fer keksoz byen avek lasazes, dan en fason entelizan e transparan, » Onorab Decommarmond ti konklir.