Follow us on:

Facebook Twitter LinkedIn YouTube

Archive -National Assembly

Pouvwar Lotorite Laviasyon Sivil Sesel pou ganny ranforsi |31 July 2014

Byento lalwa aktyel Lotorite Laviasyon Sivil Sesel ki date 2005 pou ganny amande e modifye pour permet Lazans Laviasyon Sivil Sesel (SCAA) ganny donnen tou son  responsabilite, fonksyon ek pouvwar pour permet li parmi lezot  keksoz enplimant antyerman son bann lobligasyon anba bann konvansyon enternasyonal .

Sa pou vin posib apre ki Lasanble Nasyonal dan son dernyen sesyon pour sa trimes Mardi ti a linanimite aprouve ki sa lalwa i ganny amande a traver en proze-de-lwa ki Minis responsab pour Zafer Entern ek Transpor Joël Morgan ti table devan Lasanble.

Letan i ti prezant Seychelles Civil Aviation Authority Amendment Bill 2014 pour konsiderasyon Lasanble, Minis Morgan ti eksplike ki sa bann lamannman i neseser akoz Sesel konman en leta manm Lorganizasyon Laviasyon Sivil Enternasyonal (ICAO) e enn  bann pei ki’n siny konvansyon laviasyon sivil enternasyonal ek lezot konvansyon lo regilarite ek sekirite transpor aeryen, i annan en lobligasyon mandatwar anver lakominote enternasyonal transpor aeryen pour enplimant bann norm ek pratik rekonmande ki trouve dan bann aneks konvansyon Chicago date  Desanm 1944, ek Konvansyon Tokyo date Septanm 1963.

Minis Morgan ti fer resorti ki Lalwa Lotorite Laviasyon Sivil ki an egzistans depi 2005 i donn serten fonksyon ek pouvwar Lotorite Laviasyon Sivil Sesel me bann fonksyon sekirite laviasyon sivil pa ti ganny enkorpore dan sa lalwa an 2005 akoz sa letan sa responsabilite ti ganny konfye avek lafors Lapolis Sesel. Sa fonksyon sekirite ti ganny transfer avek Lotorite Laviasyon Sivil Sesel an Me 2009.

An konsekans, Lotorite Laviasyon Sivil Sesel in vin sa lotorite konpetan pour devlop, enplimant e mentenir en progranm nasyonal lo sekirite laviasyon sivil.
 
Sa bann lamannman a osi permet met anplas en kad legal pour sa bann nouvo fonksyon ki SCAA pe antreprann. Sa lalwa pou ganny amande anba seksyon 5 ek 6, presizeman anba seksyon 5 (1).

 

 

 

» Back to Archive