Dite pour lasante |17 April 2014
Dan en letan kot lalkol i prezan dan tou rasanbleman sosyal e kot son konsonmasyon ek labi in vin enkyetan dan nou sosyete, ki meyer fason pour selebre e promot lasante ki par en apremidi dite ?
Sa i reanmenn en tradisyon Angle kot a en lepok dan listwar, fanmir ou zanmi ti reini dan salon ou anba lavarang pour koz koze ler zot pe bwar dite.
Se annefe dan sa fason ki Minister Lasante ti’n deside pour termin bann aktivite ki ti komemor Lazournen bann Travayer Lasante ki ti tonm le 6 Avril. Nou a rapel ki sa bann aktivite ti deroul pandan en semenn antye. Tenm ki ti’n swazir pour sa komemorasyon sa lannen ti «Mon lasante, mon responsabilite».
Pour remersye son bann travayer ki’n pran retret, Minister Lasante ti’n deside pour donn bon legzanp sa responsabilite an organizan en apremidi dite dan zarden Batiman Twa Rouz Lopital Sesel. Parey proverb e moral Seselwa i dir: «Lasarite i komans dan lakour».
En senkantenn ansyen zofisye lasante ti’n donk zwenn avek bann travayer aktyel otour en tas dite, zi fri e grensek lokal e anmenmtan apresye animasyon ofer par Lakoral Lasante e James Barbe ek son group. Zot ti sanble pe byen apresye sa lanbyans detant, e serten ti menm fer resorti ki depi lontan zot ti pe esper en tel moman e ki sa i devret repete dan lefitir.
Minis pour Lasante, Madanm Mitcy Larue, ti dir son bann envite ki sa lokazyon i en siny rekognisyon ek remersiman pour zot servis ek bon travay dan lepase. I ti demann zot pour anmize e anmenmtan reflesir lo bann bon moman ki zot in pase dan sekter lasante akoz zot kontribisyon in ede pour anmenn li lo sa bon nivo ki i ete ozordi.
Minis ti fer rapel ki sa bann travayer in sirmont bokou defi dan en peryod kot ti annan mwens resours ki ozordi, me se zot devouman ek konpasyon ki’n fer zot reisir.
Madanm Larue ti envit bann ki santi zot ankor kapab pour reste aktif e pour avek zot leksperyans, revin donn en koudmen pour fer marse servis lasante.
«Ler ou’n travay koman en travayer lasante ou reste touzour en travayer lasante. Akoz ou leker i reste dan lasante,» i ti dir.
Dan kad tenm «Mon lasante, mon responsabilite», Minis Larue ti lans en lapel pour lit kont bann move pratik ki pe afekte lasante nou bann zenn.
«Sakenn de nou i devret adopte bann bon pratik pour fer sa tenm vin lo nou lazanda tou le zour, asir son sikse e gard nou koman en pep an bonn sante e en pei prosper,» i ti dir.
Pa zis tradisyon bwar dite ki Minister Lasante ti promouvwar pandan sa apremidi. Bann envite ti ganny privilez pour repran en lift ki mars avek lakord e ki’n egziste depi konstriksyon lopital, me ki ti’n aret marse depi en bon pe letan. Minister Lasante in repar li koman en proze proteksyon leritaz, parey Batiman Twa Rouz limenm ki en moniman nasyonal e ki devret ganny prezerve.
Pandan sa seremoni bann envite ti osi ganny sans vwar en legzibisyon portre.
Nou seri portre i montre bann envite pe partisip dan sa apremidi detant, ki ti osi enkli en legzibisyon portre. 
